İlham Əliyev Bundestaqı siyasi sifariş yerinə yetirməkdə ittiham edib

Prezident İlham Əliyev Bundestaqın “erməni soyqırımı” haqqında qətnaməsini böyük ədalətsizlik və ikili standartların təzahürü adlandırıb.

“Bu, ədalətsizlik, ikili standartlar və tarixin təhrifidir. Biz bununla barışa bilmərik. Diaspor təşkilatlarına türk diasporu ilə birlikdə hərəkət etmək təlimatı verilib. Biz birlik nümayiş etdirməliyik”, deyə Əliyev cümə günü Türkiyə baş naziri Binali Yıldırımla birgə keçirdiyi mətbuat konfransında bildirib.

“Qətnamə siyasi sifariş xarakteri daşıyır. Görünür, Türkiyəni nəyəsə məcbur etmək, onun müstəqil siyasətinə təsir göstərmək istəyirlər. Erməni məsələsi böyük dövlətlərin əlində sadəcə bəhanə, alətdir”, deyə Əliyev qeyd edib.

Daha sonra o xatırladıb ki, ötən il iyunun 12-də Azərbaycan da Bundestaq tərəfindən “ədalətsizliklə” qarşılaşıb. Həmin vaxt “yalana əsaslanan ölkədə guya insan hüquqlarının pozulması haqqında qətnamə” qəbul edilmişdi.

Azərbaycana və Türkiyəyə qarşı qətnamələr qəbul edənlər böyük tarixi səhvə yol verir, deyə Əliyev bildirib. -06D-