İlham Əliyev R.Səfərovun işi üzrə beynəlxalq tənqidi qəbul etmir

Prezident İlham Əliyev zabit Ramil Səfərovun əfvi ilə bağlı rəsmi Bakının ünvanına səslənən beynəlxalq tənqidi əsassız hesab edir.

Dünən Şəki rayonunda çıxış edərkən Əliyev təkrar edib ki, Səfərov Avropa Konvensiyası əsasında Azərbaycana təhvil verilib və ölkə konstitusiyası əsasında əfv edilib.

“Ermənilər, dünyadakı erməni lobbisi dünyaya səs-küy salıb. Bizim əsas düşmənimiz erməni lobbisidir. Onlar indi Azərbaycana qarşı çirkin kampaniya həyata keçirirlər. Onların himayə etdiyi satqın, ikiüzlü, rüşvətxor senatorlar, beynəlxalq qurumların rəhbərləri, bəzi siyasətçilər Azərbaycana qarşı əsassız ittihamlar irəli sürürlər. Bu ittihamlar üçün heç bir əsas yoxdur. Hər şey Avropa Konvensiyası əsasında qəbul edilmiş qanun çərçivəsində olub”, deyə Əliyev bildirib.

Daha sonra o, Avropa Şurasının baş katibi Tyeborn Yanqlandı tənqid edib. “Görün Avropa Şurasının baş katibi nə deyil? Humanizmi təcəssüm etdirməli olan bu insan. Avropa Şurası dəfələrlə Azərbaycana qarşı əsassız ittihamlar irəli sürüb. Bunu yaxşı bilirəm, çünki üç il Azərbaycanın Avropa Şurasındakı nümayəndə heyətinə rəhbərlik etmişəm.

İsrarla cinayətkarları azad etməyimiz üçün təzyiq göstərirdilər. Yadımdadır, onlar arasında Avropa Şurasının israrı ilə azad edildikdən sonra bütün ailəsini – atasını, anasını və azyaşlı qızını qətlə yetirən cinayətkar da var idi.

İndi isə həmin Avropa Şurası məni Ramil Səfərovu əfv etməkdə ittiham edir. Bu insanın Vətənində (Norveç nəzərdə tutulur) Breyvik 80 nəfəri öldürüb və ona 21 il həbs cəzası verilib. Hər qətlə yetirilən şəxs üçün 3 ay. Belə şey olar? Niyə o bu barədə danışmır?”, deyə Əliyev bildirib.

Azərbaycan prezidenti həmçinin Amerika senatoru Menendezin qərəzli mövqeyini qeyd edərək, onu “erməniyönlü”, “islamofob” və “anti-Azərbaycançı” xadim adlandırıb.

Əliyev qeyd edib ki, heç bir təzyiqə güzəştə getməyəcək.

Xatırladaq ki, AŞ baş katibi Yanqland bir müddət əvvəl qətl törətmiş Səfərovun “qəhrəmanlaşdırılmasının” yolverilməz olduğunu bildirmişdi. “Hüquqi prosedurlarla bağlı şərh vermək istəməzdim, amma həbs edilmiş cinayətkarın qəhrəman kimi qəbul edilməsini qəbuledilməz hesab edirəm”, deyə Yanqland bildirmişdi.

Qeyd edək ki, AŞPA sədri Jan-Klod Minyon Yanqlanddan daha sərt mövqe bildirmişdi, lakin Əliyev onun ifadələri ilə  bağlı şərh verməyib. -06D-