İran özünün Xəzər donanmasını gücləndirir

İslam İnqilabı Keşikçiləri Korpusu Xəzərdə öz bölmələrini yerləşdirəcək ki, bu da İranın Xəzər regionunda təhlükəsizliyə böyük önəm verməyə başladığını göstərir. Fars agentliyi bildirib ki, Xəzərdə təlim mərkəzi təsis ediləcək. Məqsəd İslam İnqilabı Keşikçiləri Korpusunun hərbi-dəniz bölmələrini dənizdə zəruri əməliyyatların keçirilməsinə hazırlamaqdır. 

Mənbənin məlumatına görə, bundan əvvəl Xəzər dənizində təhlükəsizliyi adi hərbi-dəniz donanması təmin edirdi, Korpus bölmələri isə Fars körfəzinə cavabdeh idi. Lakin görünür, vəziyyət dəyişib.

Bu addım Rusiya və İranın Xəzərdə birgə təlimlər keçirmək niyyətində olmalarını bəyan etmələri, həmçinin “ölkənin ərazi sularını müdafiə etmək iqtidarında olduğunu nümayiş etdirmək” məqsədilə İranın öz təlimlərimi keçirməsi fonunda atılıb.

“Korpus əsgərləri adi donanmanın hərbçiləri ilə müqayisədə daha sərtdirlər və bu da digər Xəzəryanı dövlətlərlə gərginliyə gətirib çıxara bilər. Əlbəttə, bu, Azərbaycana da aiddir və bu addım ona qarşı yönəlib.

Bu yaxınlarda İran Xəzərdə yeni karbohidrogen yataqlarının aşkar olduğunu bəyan edib. Güman edirəm ki, o, hərbi-dəniz donanmasının möhkəmləndirilməsini öz iqtisadi maraqlarının qorunmasının vacibliyi ilə izah edəcək. Bu, Bakıya təzyiq göstərmək və ümumilikdə gələcəkdə Xəzərdə böyük imkanlar qazanmaq məqsədilə Tehranın taktiki gedişidir”, - ekspert Aleks Vatanka Eurasianet saytına bildirib. -02D-