İran və İraq ətrafında vəziyyət gərginləşməkdə davam edir

Bakı/06.01.20/Turan: “Qüds” bölməsinin komandiri Qasım Süleymaninin ölümündən sonra İran və İraq ətrafında siyasi gərginlik hər gün pisləşməkdə davam edir.

Bu gün İraq hakimiyyəti ABŞ hərbi qüvvələrinin ölkə ərazisi boyunca hərəkətini qadağan edən qərar qəbul edib. Bir gün öncə İraq parlamenti Amerika qüvvələrinin ölkədən çıxarılması barədə qərar qəbul etmişdi.

Buna cavab olaraq ABŞ pezidenti Donald Tramp bildirib ki, qoşunların geri çəkilməsi İraqda qurulan hərbi baza üçün kompensasiya alındıqdan sonra mümkün olacaq.

Prezident təyyarəsinin bortunda jurnalistlərlə söhbətində Tramp deyib ki, ABŞ-ın İraqda milyardlarla dollara başa gələn “olduqca bahalı” aviabazası var. “Bizə bunun əvəzini ödəməyincə heç yerə getməyəcəyik”, - prezident bildirib və “heç zaman görmədikləri” sanksiyalar ilə hədələyib.

Türkiyə, İran, Rusiya və bir sıra Avropa ölkələrinin rəhbərliyi isə bölgədə vəziyyətin daha da kəskinləşəcəyi təqdirdə öz hərəkətlərini koordinasiya etməyə çalışırlar. Belə ki, ötən gün Rusiyanın müdafiə naziri Şoyqu ilə Türkiyənin kəşfiyyat rəisi Hakan Fidan arasındakı telefon danışığında bu mövzu müzakirə edilib.

Əsasən tərəflər Yaxın Şərq və Liviyada “bölgədəki gərginliyi azaltmaq və böhranlı vəziyyəti həll etmək” üçün mümkün olan birgə hərəkətləri müzakirə ediblər, RF Müdafiə Nazirliyinin mətbuat xidməti bildirib.

Bu gün Şoyqu İran Silahlı Qüvvələri Baş Qərargah rəisi Məhəmməd Baqeri ilə telefonla danışıb. Tərəflər general Qasım Süleymaninin öldürülməsi ilə əlaqədar Suriyada və Yaxın Şərq bölgəsində durumun eskalasiyasına yol verməmək üçün əməli addımları müzakirə ediblər.

Avropa paytaxtları Tehranın nüvə sazişindən çıxması və ABŞ-a qarşı hərbi əməliyyatlara hazırlaşması ilə bağlı bəyanatlarından narahatdır. Yanvarın 5-də NATO ölkələrinin fövqəladə iclası bu mövzuya həsr olunmuşdu. -02D-