İraq Azərbaycanla əməkdaşlığın inkişafında maraqlı olduğunu bildirib

Bakı/04.03.23/Turan: İraq prezidenti Əbdül Lətif Camal Rəşidin Azərbaycana səfəri başa çatıb. O, Qoşulmama Hərəkatının COVID-19-a qarşı mübarizə üzrə Təmas Qrupunun Bakıda keçirilən sammitində iştirak edib.

Səfər çərçivəsində Azərbaycan prezidenti İlham Əliyev İraq prezidentini qəbul edib.

Görüş zamanı 2022-ci ildə Əlcəzairdə keçirilən Ərəb Dövlətləri Liqasının sammitində öz iştirakını məmnunluqla xatırlayan Əliyev qeyd edib ki, Azərbaycan ərəb ölkələrilə əlaqələrin inkişafına xüsusi önəm verir, Azərbaycan prezidentinin saytı bildirib.

İraq Prezidenti qeyd edib ki, onun ölkəsi Azərbaycanla münasibətlərin daha da möhkəmləndirilməsində maraqlıdır. O, əməkdaşlığın genişləndirilməsi üçün yaxşı imkanların olduğunu deyib.

Öz növbəsində Əliyev iki ölkənin beynəlxalq təşkilatlarda sıx əməkdaşlığı üçün geniş imkanların olduğunu deyib, bu kontekstdə OPEC+ və digər formatlara işarə edib.

Əliyev həmçinin xatırladıb ki, pandemiya dövründə Azərbaycan Qoşulmama Hərəkatının iştirakçısı olan dövlətlərə, o cümlədən İraqa humanitar yardım göstərib.

O, İraqın dövlət başçısını Azərbaycana rəsmi səfərə dəvət edib.

Əbdül Lətif Camal Rəşid dəvəti məmnuniyyətlə qəbul edib, o da  öz növbəsində Azərbaycanın dövləti başçısını İraqa səfərə dəvət edib.

Söhbət zamanı dövlət başçıları investisiya, energetika, tikinti, nəqliyyat, təhsil sahələrində əməkdaşlıq məsələlərini müzakirə ediblər, qarşılıqlı ticarətin genişləndirilməsinin və işgüzar dairələrin nümayəndə heyətlərinin səfərlərinin təşkilinin vacibliyini vurğulayıblar.06D