İslam Əməkdaşlıq Təşkilatı Gənclik Zirvəsındən Azərbaycana dəstək

İstanbul/14.04.16/Turan:  İstanbulda oz işinə başlayacaq İƏT Dövlət Başçıları Sammiti öncəsi, İslam Konfransı Gənclər Forumu tərəfindən İƏT Gənclik Zirvəsi təşkil edilmişdir.

Rəsmi bağlanış mərasimində çıxış edən İKGF sədri Elşad İskəndərov bildirmişdir ki, Gənclik Zirvə toplantısında 57 İƏT-ə üzv ölkəni və qeyri-müsəlman ölkələrinin aparıcı müsəlman azlıqlarını təmsil edən 200-ə yaxın gənc liderlə yanaşı, 8 ölkənin Gənclər və İdman nazirləri, 6 beynəlxalq təşkilat rəhbəri və dünyanın  bir sıra aparıcı elm və ictimai xadimləri, ekspertlər iştirak etmişdir. İki gün davam edən panel və işçi qrup müzakirələri zamanı Gənclik Zirvəsi tərəfindən yaxın illərdə İƏT-in gənclik siyasətinin əsas parametlərini özündə əks etdirən “Gənclik Strategiyası” qəbul edilmişdir.

Qapanış mərasimində çıxış edən İSESCO baş direktoru Əbdüləziz Tüveyciri İƏT tarixində ilk dəfə olaraq keçirilən İƏT Gənclik Zirvəsinin əhəmiyyətini yüksək qiymətləndirərək, tədbirin Yekun sənədində gənclərin inkişafı, təhsili və gənclər arasında işsizliyin aradan qaldırılması kimi mühüm problemlərin konkret və yaradıcı həlli təkliflərinin yer aldığını qeyd edərək Zirvə iştirakçılarını təbrik etmişdir.

Bunlardan əlavə, tədbir zamanı, İƏT üzv ölkələrini və beynəlxalq təşkilatları təmsil edən 200-dən artıq gənc lider tərəfindən Azərbaycanın öz ərazi bütövlüyünü bərpa etməklə bağlı atdığı addımlar və  haqq mövqeyinə xüsusi dəstək də nümayiş etdirilmişdir.

Bu məqsədlə Zirvə toplantısının 200-dən artıq gənc iştirakçısı əllərində Azərbaycan bayrağı ilə çəkdirdikləri şəkillərlə #SupportAzerbaijan haştaqlı sosial şəbəkə kampaniyasına start vermişlər.  -02D-