İsrail Azərbaycanda hərbi zavodun inşasına lobbiçilik edir

Bakı/28.06.19/Turan: ABŞ-ın 2020-ci il üçün müdafiə büdcəsi layihəsi Türkiyəyə F-35 qırıcılarının verilməsini qadağan edir. Müvafiq sənəd Amerika Senatının saytında dərc edilib, RİA Novosti bildirir.

Bu informasiyanın Azərbaycana aidiyyatı var, çünki newsmab.com İnternet-resursun məlumatına görə, aviatexnikanın göndərişinin qadağan edilməsi barədə amerikalıların qərarı təkcə Türkiyəyə hərbi təyyarələrin göndərişini deyil, həm də Türkiyədə F-35-lər üçün aviasiya mühərriklərinin təmiri və yenilənməsi üzrə hərbi zavodun inşasını mümkünsüz edir.

Yaranmış yeni vəziyyətdə bu zavodun tikintisi üçün yer məsələsi ortaya çıxır. İsrail yaramır, çünki ordusu F-35 təyyarələri ilə təchiz edilmiş və mühərriklərinin təmirə ehtiyacı olan ərəb dövlətlərinin bəzisi bu ölkə ilə ünsiyyətdə deyil. Newsmab.com bildirir ki, İsrail Azərbaycana lobbiçilik edir, belə ki bu dövlətdə zavod onun məhsullarına siyasi zərər dəymədən inşa edilə bilər.

"İsrail nümayəndələri Vaşinqtonda F-35 qırıcıları üçün aviasiya mühərriklərinin təmiri və yenilənməsi üzrə zavodun Bakıda inşasına lobbiçilik edirlər. Bu qərarın mürəkkəbliyi ondadır ki, Azərbaycan F-35 təyyarələrinin mənimsənilməsi proqramının iştirakçısı deyil. Bundan əlavə, Azərbaycan Türkiyənin yaxın müttəfiqidir və bu, mənəvi-etik xarakterli əlavə problemlər yaradır", - sayt bildirib.

2018-ci ilin avqustunda İsrail mətbuatı ("Xadaşot 2" xəbərlər xidməti) bildirmişdi ki, İsrail müdafiə şirkətləri rəhbərliyi və ölkənin siyasi rəhbərliyi Amerika hakimiyyəti və Lockheed Martin korporasiyası ilə beşinci nəsil F-35 hərbi təyyarəsi üçün mühərrik istehsalının Türkiyədən çıxarılmasına dair danışıqlar aparırlar.

F-35-in detalları müxtəlif ölkələrdə istehsal olunur. Əsasən İsraildə Aviasiya Sənayesi Konserni qanadları istehsal edir, Türkiyədə isə mühərriklərin təmir zavodu yerləşir.

ABŞ və Türkiyə arasındakı münaqişə fonunda (bu çərçivədə Ankaraya F-35 təyyarələrinin göndərişi dondurulub) İsraildə vəziyyətdən yararlanmaq və yerli müdafiə sənayesi üçün əlavə sifarişlər almaq istəyirlər.

"Maariv" qəzeti qeyd edir ki, danışıqların təşəbbüsçüsü Yeş Atid Partiyasının sədri Yair Lapiddir. Lakin İsrail və bəzi ərəb ökələri arasındakı düşmənçilik zavodun İsraildə fəaliyyətini perspektivsiz edir.

Rəsmi Bakı ölkədə aviazavodun tikintisinin mümkünlüyünü şərh etmir. Lakin Azərbaycanın bu sahədə təcrübəsi var. Belə ki, 2018-ci ildə Bakıda "Rusiya vertolyotları" holdinqi və Azərbaycanın Silk Way Helicopter Services şirkətinin birgə servis mərkəzi fəaliyyətə başlayıb.-0-