Laçın yolu bağlı deyil, istintaq tədbirləri ilə əlaqədar müvəqqəti olaraq bağlanıb - rəsmi mətbuat

Bakı/24.06.23/Turan: Azərbaycanda akkreditə olunmuş diplomatik korpusun nümayəndələri bu gün Laçın rayonuna gəliblər. Diplomatları Azərbaycan prezidentinin köməkçisi Hikmət Hacıyev müşaiyət edir.

Səfərdə 33 ölkədən 60-dan çox diplomat və hərbi attaşe iştirak edir. 

Xarici diplomatlar Laçın rayonuna səfər çərçivəsində Ermənistan və Azərbaycan arasında Laçın sərhəd-gömrük buraxılış məntəqəsinin yerləşdiyi körpüyə gəliblər. Diplomatlara burada iyunun 15-də Ermənistan ərazisindən açılan atəşlə Azərbaycan sərhədçisinin yaralandığı haqqında məlumat verilib.

Eyni zamanda, xarici diplomatlara bildirilib ki, bu silahlı təxribata qədər Xankəndində yaşayan erməni əsilli sakinlər bu buraxılış məntəqəsindən maneəsiz istifadə edirdilər. Hazırda tibbi yardıma ehtiyacı olan vətəndaşların daşınması üzrə Beynəlxalq Qızıl Xaç Komitəsinin fəaliyyəti üçün şərait yaradılıb, deyə AzərTAc dövlət informasiya agentliyinin məlumatında bildirilir. Yəni bəzi dairələrin iddia etdiyi kimi yol bağlı deyil. Sadəcə olaraq, Ermənistanın növbəti təxribatı ilə əlaqədar müvəqqəti istintaq tədbirləri həyata keçirilir.

Xarici diplomatların diqqətinə çatdırılıb ki, "Ermənistan tərəfi Azərbaycan tərəfindən istintaq tədbirlərinin aparılması faktından yalançı təbliğat üçün istifadə edirlər". Bəzi Avropa siyasətçiləri də gəlib körpünün digər tərəfində dayanır və həqiqəti əks etdirməyən birtərəfli məlumatlar yayır, deyə məlumatda vurğulanır.

Qeyd edək ki, iyunun 23-də Azərbaycanın və Ermənistanın bir sıra KİV-ləri Azərbaycan tərəfin sərhəddə beton bloklar quraşdırmaqla avtomobil yolunu tam bağladığı haqqında videoçarxlar yayıb. 06