Macarıstan parlamenti Türk PA-da müşahidəçi statusu alacaq

İyunun 12-13-də türkdilli ölkələrin Parlament Assambleyasının – Türk PA 5-ci sessiyası keçiriləcək. Sessiyada iştirak etmək üçün Türkiyə, Qazaxıstan və Qırğızıstan parlamentlərinin spikerləri Cəmil Çiçək, Kabibulla Cakupov və Asılbey Jeenbeyov Bakıya gəlirlər.

Sessiya zamanı Turk PA-ya sədrlik Türkiyədən Azərbaycana keçəcək.

Parlamentdəki mənbələrdən Turan-a məlum olub ki, sessiyada 2013-cü ildə fəaliyyətə, təşkilat katibliyinin büdcəsinin icrasına və katbliyin 2015-cü il üçün büdcə layihəsinə dair hesabatlar dinləniləcək, 6-cı plenar iclasın vaxtı və keçiriləcəyi yer müəyyən ediləcək. 

Sessiyanın ikinci günündə, iyunun 13-də Azərbaycan, Türkiyə, Qazaxıstan və Qırğızıstan parlamentlərinin spikerləri çıxış edəcəklər.

Sessiya iştirakçıları beynəlxalq əlaqələr, sosial, mədəni və humanita, iqtisadiyyat, ticarət, maliyyə, hüquqi məsələlər üzrə komissiyaların məruzə və tövsiyələrini dinləyəcəklər.

Bundan əlavə, Macarıstan parlamentinə Turk PA-da müşahidəçi statusunun verilməsi nəzərdə tutulur.

Turk PA-nın 5-ci plenar sessiyasında MDB Parlamentlərarası Assambleyası nümayəndə heyəti də iştirak edəcək.–06D-