MDB xüsusi xidmətləri islam radikalizminə qarşı mübarizə üzrə fəaliyyəti əlaqələndirir (YENİLƏNİB)

Azərbaycan “İslam dövləti” qruplaşması ilə bağlı cihad ideologiyasının yayılmasından narahatdır. MDB ölkələrində radikal dini ideologiyanın yayılması təhlükəsinin artması və “İslam dövləti” ilə bağlı gizli strukturlar şəbəkəsinin formalaşması bütün xüsusi xidmətlərin əməkdaşlığının möhkəmləndirilməsini tələb edir. Bu barədə çərşənbə günü Bakıda MDB ölkələrinin Təhlükəsizlik Orqanları Şurasının açılışında Azərbaycan Prezident Administrasiyasının hüquq-mühafizə orqanları ilə iş üzrə şöbə müdiri Fuad Ələsgərov bildirib.

“Bu yaxınlarda bizim xüsusi xidmətlərimiz bir sıra təhlükəli dini ekstremist qrupların fəaliyyətinin qarşısının alınması üzrə bir sıra uğurlu əməliyyatlar həyata keçirib. Hesab edirik ki, səmərli təcrübə mübadiləsi və etibarlı tərəfdaşlıq münasibətləri xüsusi xidmətlər qarşısında duran vəzifələrin həllində ciddi nəticələrə nail olmaq üçün əhəmiyyətli zəminlər yaradan mühüm alətlərdir”, deyə o bildirib.

Digər iclas iştirakçılarının çıxışlarından aydın olub ki, MDB ölkələrinin xüsusi xidmətləri “İslam dövləti”nə və MDB məkanında radikal dini ideologiyanın yayılmasına qarşı mübarizə üzrə birgə tədbirlər işləyib hazırlamaq niyyətindədirlər.

Bakıda keçirilən 41-ci iclasa müşahidəçi qismində bir sıra Avropa ölkələrinin nümayəndələri dəvət olunub. -0-

2016 Sentyabr 28 (Çərşənbə) 10:34:24

Çərşənbə günü Bakıda MDB dövlətləri təhlükəsizlik və xüsusi xidmət orqanları rəhbərləri Şurasının iclaşı açılıb. Ötən gün prezident İlham Əliyev onları qəbul edib.

“Biz Şuranın fəaliyyətinə böyük əhəmiyyət veririk, hesab edirik ki, o çox səmərəli, gərəklidir, üzv ölkələr arasında əməkdaşlığın, habelə ölkələrimizdə təhlükəsizlik sisteminin möhkəmlənməsinə kömək edir”, - dövlət başçısı bildirib.

“Heç bir ölkənin təhlükəsizliyini təkbaşına təmin etmək mümkün deyil. Əməkdaşlıq, qarşılıqlı fəaliyyət olmadan, terrorizmə, radikalizmə, ekstremizmə qarşı mübarizədə səyləri birləşdirmədən təhlükəsizliyi təmin etmək çox çətindir. 

Yaxın Şərqdə praktiki olaraq nəzarətdən çıxmış hadisələr, Avropa paytaxtlarında, Yer kürəsinin digər regionlarında terror hücumları, gərginliyin artması – bütün bunlar günümüzün reallıqlarıdır”, - İ.Əliyev vurğulayıb.

Öz növbəsində MDB dövlətləri təhlükəsizlik və xüsusi xidmət orqanları rəhbərləri Şurasının sədri, RF Federal Təhlükəsizlik Xidmətinin direktoru Aleksandr Bortnikov deyib ki, təhlükələr ilk növbədə terrorizmlə bağlıdır.

İclasda müzakirə ediləcək əsas problem “MDB ölkələrinə qarşı kənardan yaranan təhlükələrin qiymətləndirilməsi və onlara qarşı mübarizə tədbirlərinin işlənib hazırlanması” olacaq. -02D-