Məhkəmə vəkilin Dövlət Təhlükəsizliyi Xidmətindən şikayətinə baxmaqdan imtina edib

Çərşənbə axşamı Səbail Rayon Məhkəməsi vəkil Fəriz Namazlının Azərbaycan Dövlət Təhlükəsizliyi Xidmətindən şikayətini icraata qəbul etməyib.

Vəkil Turan agentliyinə bildirib ki, şikayət avqustun 31-də axşam iş günündən sonra onun faktiki olaraq saxlanılması ilə əlaqədar verilib.

"Axşam işdən sonra istirahət edərkən məni saxladılar. Cib telefonumu əlimdən aldılar və dedilər ki, onlarla getməliyəm. Məni Dövlət Təhlükəsizliyi Xidmətinə apardılar və bir iş üzrə şahid kimi dindirməyə başladılar. Buraya gəlişimin səbəbini Dövlət Təhlükəsizliyi Xidmətində öyrəndim. Bu, faktiki olaraq  saxlanılma idi. Qanunvericiliyə görə, vəkilin saxlanılması barədə baş prokuror və Vəkillər Kollegiyasına əvvəlcədən bilgi verilməlidir, ancaq bu edilmədi", - vəkil  deyib.

Lakin "məhkəmə nəzarəti qaydasında şikayət mövzusu olmadığını" hesab edərək məhkəmə şikayəti icraata qəbul etmədi.

Vəkil apellyasiya şikayəti vermək niyyətindədir.

Namazlı hansı iş üzrə dindirildiyini açıqlamayıb və qeyd edib ki, bu, vəkili olduğu işlə əlaqəli deyil.

Namazlı  qeyd edib ki, Vəkillər Kollegiyası vəkilin qanunsuz saxlanılmasına heç bir reaksiya verməyib.

Fariz Namazlı hüquq- müdafiə üzrə vəkil kimi tanınır. O, hüquq müdafiəçiləri tərəfindən siyasi məhbus kimi tanınan bir çox şəxsi müdafiə edib.