Məmmədyarov və Bolton Azərbaycan və ABŞ münasibətlərinin strateji xarakteri haqqında

Bakı/24.10.18/Turan: Azərbaycan XİN başçısı Elmar Məmmədyarov bu gün Bakıda səfərdə olan ABŞ prezidentinin milli təhlükəsizlik məsələləri üzrə müşaviri Con Boltonu qəbul edib, bu barədə XİN-in məlumatında deyilir.

Azərbaycan ABŞ-la əlaqələrə xüsusi əhəmiyyət verir və tərəflər bir sıra sahələrdə, o cümlədən terrorizmə qarşı mübarizə sahəsində sıx əməkdaşlıq edir. O, həmçinin ABŞ-a Azərbaycanın təşəbbüsü ilə həyata keçirilən layihələri dəstəklədiyinə görə təşəkkür edib.

Bolton iki ölkə arasında əməkdaşlığın dərinləşdirilməsinin əhəmiyyətini qeyd edərək, Azərbaycan və ABŞ arasında münasibətlərin strateji xarakter daşıdığını bildirib.

ABŞ prezidentinin müşaviri qeyd edib ki, ölkəsi terrorizmlə mübarizə çərçivəsində Azərbaycanın Əfqanıstandakı əməliyyatlara töhfəsini yüksək qiymətləndirib.

E.Məmmədyarov Boltona Qarabağ münaqişəsi üzrə danışıqlar prosesi barədə məlumat verib və status-kvonun davam etdirilməsinin qəbuledilməz olduğunu bildirib. O, həmçinin Azərbaycanın işğal edilmiş ərazilərində Ermənistan silahlı qüvvələrinin mövcudluğunun qanunsuz olduğunu qeyd edib.

Sülhə nail olmaq üçün ilk növbədə Ermənistan işğal edilmiş ərazilərdən öz qoşunlarını çıxarmalı və doğma yurdlarından zorla qovulmuş insanların öz evlərinə qaytarılması üçün şərait yaratmalıdır, deyə o qeyd edib.

Görüşdə tərəflər Bakı-Tbilisi-Qars və Cənub Qaz Dəhlizi kimi Azərbaycanın təşəbbüsü ilə həyata keçirilən layihələr haqqında fikir mübadiləsi aparıblar. -0-