Milli Məclisin spikeri Rusiyaya səfərə gedir

İyunun 4-də Milli Məclisin spikeri Oqtay Əsədovun sədrlik etdiyi nümayəndə heyəti Rusiyaya rəsmi səfərə yola düşür. Parlamentin mətbuat xidmətinin məlumatına görə, nümayəndə heyətinin tərkibinə bir sıra parlament komissiyalarının rəhbərləri və deputatlar daxildir.

Səfər çərçivəsində Əsədovun RF Federal Məclisi Federasiya Şurasının sədri Valentina Matviyenko, Dövlət Dumasının spikeri Sergey Narışkin, ölkənin Baş nazirinin müavini Dmitri Roqozin ilə görüşləri nəzərdə tutulub.

Görüşlərdə parlamentlər səviyyəsində münasibətlərin hazırkı vəziyyəti və inkişaf perspektivləri, qanun yaradıcılığı sahəsində təcrübə və informasiya mübadiləsi, deputatların qarşılıqlı səfərləri, ölkələrimiz arasında müxtəlif sahələrdə ikitərəfli əməkdaşlığın daha da genişləndirilməsi və digər məsələlər ətrafında geniş fikir mübadiləsi aparılacaq.

Səfər iyunun 5-də başa çatacaq.

Qeyd edək ki, son illər Azərbaycan hakimiyyəti Rusiyanın qanunvericilikdə həyata keçirdiyi dəyişiklikləri fəal şəkildə təkrar edir. Belə ki, vətəndaş cəmiyyətinin fəaliyyətini məhdudlaşdıran, hakimiyyətin rəqiblərinin və fərqli düşünənlərin, habelə müstəqil mətbuatın təqibini gücləndirən qanunvericilik aktları əsasən Rusiya qanunlarından köçürülüb. -02D-