Milli Şura Azərbaycan hakimiyyətinin anti-Avropa mövqeyini pislədi

Demokratik Qüvvələrin Milli Şurasının Koordinasiya Mərkəzi iyunun 11-də Aİ-nin Azərbaycanın və digər 5 postsovet ölkəsinin iştirakçısı olduğu Şərq Tərəfdaşlığı proqramı ətrafındakı vəziyyəti pisləyib.

Turan agentliyinin direktoru Mehman Əliyevin iyunun 4-5-də Stokholm Keçid İqtisadiyyatı İnstitutunun təşəbbüsü ilə Kiyevdə keçirilmiş Şərq Tərəfdaşlığı proqramının aralıq yekunlarına və perspektivlərinə həsr olunmuş beynəlxalq konfrans haqqında məlumatı dinlənilib.

KM Aİ-nin iyunun 27-də Ukrayna, Gürcüstan və Moldova ilə azad ticarət zonası haqqında Saziş imzalamaq barədə qərarını alqışlayıb.

KM bu hadisəni həmin ölkələrin Avropa ilə tərəfdaşlığa inteqrasiyasında və digər ölkələrin, o cümlədən Azərbaycanın bu istiqamətdə irəliləməsi üçün imkan yaradılmasında mühüm addım kimi qiymətləndirir.

Müzakirə iştirakçıları bütün digər ölkələrin yüksək hökumət səviyyəsində təmsil olunmasına baxmayaraq, rəsmi Bakı nümayəndəsinin konfransda iştirakdan imtina etməsini mənfi qiymətləndiriblər.

Müzakirələr zamanı Azərbaycan hökumətinin Şərq Tərəfdaşlığı proqramı, habelə ATƏT, Avropa Şurası çərçivəsində üzərinə götürdüyü beynəlxalq öhdəliklərin yerinə yetirilməsi məqsədilə cəmiyyətin birləşməsi üçün əlavə tədbirlər keçirmək tövsiyə olunub.

KM hesab edir ki, bu öhdəliklər korrupsiyasız və proteksionizmsiz hüquqi, demokratik dövlət və azad, şəffaf bazar iqtisadiyyatı qurmağa can atan Azərbaycan xalqının ümidlərinə tam cavab verir.

KM üzvləri həmçinin Ukraynanın Avropa seçiminə dəstəyi və onun Rusiya təcavüzündən müdafiəsini gücləndirmək zərurətini qeyd ediblər. -0-