Milli Şura siyasi məhbusların azad olunmalarını tələb edir

Бакы/13.08.13/Туран: Demokratik Qüvvələrin Milli Şurasının (DQMŞ) mətbuat xidməti qurumun 12 avqust sessiyası ilə bağlı bəyanat yayıb. 

Sənəddə sessiyada prezidentliyə vahid namizəd Rüstəm İbrahimbəyovun sona qədər dəstəklənməsi qərara alındığı xüsusi vurğulanır. Avqustun 18-də MŞ-nin ilk kütləvi aksiyasının, avqustun 19-da isə növbəti sessiyasının keçirilməsi vaxtı müəyyən edilib. MŞ-nin sessiyasının təşəbbüs qrupunun yaradılması, vahid namizədinin rəsmən irəli sürülməsiylə yadda qalan olduğu iddia edilir. MŞ üzvləri R.İbrahimbəyovun son müraciətində nəzərdə tutlan təkliflər ətrafında növbəti sessiyada məsləhətləşmələr aparmağı nəzərdə tuturlar. 

MŞ son zamanlar demokratik düşərgəyə qarşı olan basqılar və təxribatlara da münasibət bildirib.

Qurum Müsavat Partiyası gənclərinin lideri Tural Abbaslının inzibati həbsə məruz qoyulmasını pisləyir. Onun təcridxanada əli qandallı saxlanması, qidadan məhrum edilməsi kimi halları kobud qanun pozuntusu adlandırır. MŞ T.Abbaslıya təzyiqlərin siyasi mövqeyilə bağlı olduğunu bəyan edir.

Qurum avqustun 8-da naməlum şəxslərin AXCP sədri Əli Kərimlinin mənzilinə daxil olmasını da pisləyib. Bunu xüsusi xidmət orqanlarına bağlı şəxslərin törətdiyini bildirərək bu faktı AXCP sədrinə qarşı növbəti təxribat, şəxsi həyata və siyasi fəaliyyətə müdaxilə sayır. MŞ iqtidarı AXCP-yə və onun liderinə qarşı uzun illər iyrənc kampaniya aparmaqda ittiham edib. 

MŞ AXCP Ali Məclisinin üzvü, MŞ-nin vahid namizədinin Ağstafa rayonu üzrə təşəbbüs qrupunun sədri Sövdagar Mursaquliyevinin polis bölməsinə aparılmasını da pisləyib. Qurum bu təzyiqləri iqtidarın  seçkiləri saxtalaşdırmaq planının tərkib hissəsi sayır. Müsavat Partiyası başqanının müavini Tofiq Yaqublunun, NİDA Gənclər Hərəkatı üzvlərinin həbsdən azad olunmamaları repressiya siyasəti kimi dəyərləndirilib. 

MŞ rəsmi Bakının siyasi rəqiblərinə və müstəqil mövqeli ictimai-siyasi xadimlərə qarşı qanunsuzluqlarını pisləyir,  siyasi motivlərlə həbs edilənlərin dərhal azad olunmasını, siyasi təzyiqlərə son qoyulmasını tələb edirlər.-05D-