Milli Şura Yunusu dəstəklədi, Həsənquliyevi qınadı

Şənbə günü Milli Şuranın sessiyasında daxili və xarici siyasətə dair bir sıra məsələlər, eləcə də təşkilati məsələlər müzakirə olunub.

Sessiyada çıxış edən Sülh və Demokratiya İnstitutunun direktoru Leyla Yunus Milli Şura üzvlərinə ona qarşı hüquq mühafizə orqanlarının cəlb edilməsi ilə başlanan siyasi kampaniya barədə məlumat verdi.

Yunus ona qarşı başlanan istintaqı siyasi fars və hüquqi “bespredel” adlandırdı. O, hesab edir ki, ona qarşı başlanan kampaniya və “Zerkalo” qəzetinin şərhçisi Rauf Mirqədirovun Ermənistanın xeyrinə casusluqda ittiham edilməsi bir zəncirin həlqələridir və müstəqil qeyri-hökumət təşkilatlarını və KİV-i nüfuzdan salmaq məqsədi güdür.

Hüquq müdafiəçisi bildirdi ki, işin saxtalaşdırılması üçün onunla əməkdaşlıq edən insanlara təzyiq edilir. Məsələn, prokurorluq təhdid yolu ilə Qadın Krizis Mərkəzinin rəhbəri Mətanət Əzizovadan Yunusa qarşı ləkələyici ifadələr almağa çalışır. «Mətanəti bir neçə saat dindiriblər, hədələyiblər və bu gün evində axtarış aparıblar», deyə Yunus bildirib.

O həmçinin bildirib ki, “ Şəffaflıq Azərbaycan” layihəsinin rəhbəri Rəna Səfərəliyevaya da güclü təzyiq edilir.

MŞ sədri Cəmil Həsənli öz növbəsində bildirib ki, Milli Şura Leyla Yunusun və başqa vətəndaş fəallarının müdafiəsi üçün əlindən gələni edəcək.

Sessiya kuryozsuz keçməyib. Milli Şuraya yeni üzvlərin namizədləri müzakirə edilərkən Klassik Xalq Cəbhəsi Partiyasının sədri Mirmahmud Fəttayev onların qəbuluna qarşı çıxıb, əks təqdirdə MŞ-dan çıxacağını deyib. Fəttayevin bu hərəkətinə namizədlər sırasında AXCP-dən bir neçə nəfərin olması səbəb olub. Bu partiyanın sədri Əli Kərimli birliyi qorumaq üçün öz silahdaşlarının MŞ üzvlüyünə namizədliyindən imtina edib. Eyni zamanda qeyd edib ki, iki gün öncə MŞ-nın Əlaqələndirmə Şurasında yeni üzvlərin namizədliyi barədə qərar Mirmahmud Fəttayevin iştirakı ilə konsensusla qəbul edilib.

Sonda kompromis əldə edilib – yeni üzvlərin namizədliyinə baxılmayıb, klassiklər Milli Şurada qalmağa razı olub.

Şuranın iclasında Ukrayna hadisələri ilə bağlı Rusiyadan təhdidlərə xüsusi diqqət ayrılıb. Çıxışlar zamanı Ukraynaya təcavüzə bəraət qazandıran hərəkətlərə və ölkədə bir sıra dairələrin Rusiyanın Azərbaycanda itirilən mövqeyini qaytarmaq cəhdlərinə qarşı çıxmaq zərurətindən danışılıb. AXCP-nin sədr müavini Fuad Qəhrəmanlı fövqəladə hallar naziri Kəmaləddin Heydərova yaxın deputat Qüdrət Həsənquliyevin Rusiyanın Azərbaycandakı hərbi bazalarının bərpası barədə çağırışının məqbul olmadığını bildirib.

Sessiyada NIDA təşkilatının həbsdə olan fəallarının azad edilməsi üçün atılacaq addımlar, siyasi məhbuslar və başqa məsələlər müzakirə olunub. ---0—