Moskva, Bakı və Tehran energetika sahəsində əməkdaşlığı genişləndirmək niyyətindədir

Bakı/02.11.17/Turan: Azərbaycan, RF və İran energetika və nəqliyyat sahələrində əməkdaşlığı genişləndirmək niyyətindədir. Bu barədə noyabrın 1-də Tehranda Azərbaycan, Rusiya və İran prezidentləri - İlham Əliyev, Vladimir Putin və Həsən Ruhaninkn görüşündə qəbul edilmiş birgə bəyanatda deyilir.

Tərəflər beynəlxalq energetika meydanlarında qarşılıqlı fəaliyyəti dərinləşdirmək və neft-qaz sahəsində əməkdaşlığı genişləndirmək niyyətindədirlər.

"Tərəflər Rusiya Federasiyasının, Azərbaycan Respublikasının və İran İslam Respublikasının regionun və dünya energetika bazarlarının sabit fəaliyyətində mühüm rolunu qeyd edir, neft-qaz və neft-kimya sahələrində, o cümlədən neft-qaz yataqlarının kəşfiyyatı və işlənməsi sahəsində, xammal neftin və neft məhsullarının nəqli və üçüncü ölkələr vasitəsilə çatdırılmasında əməkdaşlığın genişləndirilməsini, habelə beynəlxalq energetika meydanlarında qarşılıqlı fəaliyyətin dərinləşdirilməsini təsdiq edirlər", deyə TASS agentliyinin sitat gətirdiyi bəyanatda bildirilir.

Bundan başqa, tərəflər üç dövlətin elektrik enerjisi şəbəkələrinin birləşdirilməsi üzrə layihənin həyata keçirilməsini və elektrik enerjisi ticarəti üzrə razılaşmaları dəstəklədiklərini ifadə ediblər.

Dövlət başçıları üçtərəfli əməkdaşlıqdan məmnunluqlarını bildiriblər və ölkələrin hökumətləri və parlamentləri arasında münasibətlər səviyyəsinin artırılmasının və əməkdaşlığın inkişaf etdirilməsinin əhəmiyyətini vurğulayıblar.

Moskva, Tehran və Bakı ticari-iqtisadi əlaqələrin daha da fəallaşması üzrə birgə səylərin əhəmiyyətini qeyd edir və qarşılıqlı investisiyaların inkişafı üçün əlverişli şərait yaradılması zərurətini qeyd edirlər.

Bundan başqa, tərəflər kommersiya qurumlarının nümayəndələri arasında əlaqələrin möhkəmləndirilməsinin və ticarət-sənaye palatalarının fəaliyyəti üçün zəruri şərait yaradılmasının və işgüzar dairələrin maraqlarının təşviqinin vacibliyini vurğulayıblar. "Tərəflər nəqliyyat infrastrukturunun müasirləşdirilməsi və" Şimal-Cənub" beynəlxalq nəqliyyat dəhlizinin inkişaf etdirilməsi məqsədilə avtomobil, dəmir yolu və hava nəqliyyatı sahəsində əməkdaşlığın əhəmiyyətini təsdiq edirlər. Bununla əlaqədar tərəflər Rəşt-Astara dəmir yolu xəttinin tikintisi üzrə layihənin tezliklə həyata keçirilməsi zərurətini qeyd edirlər", deyə bəyanatda bildirilir.

Liderlər dövlətlərin vətəndaşları üçün viza rejiminin daha da sadələşdirilməsinin əhəmiyyətini qeyd edirlər.

Rusiya prezidenti Vladimir Putin bildirib ki, RF Azərbaycanın boru kəməri sistemi ilə İranın şimalına qaz verməyə hazırdır.

"Diqqət çəkmək istərdim ki, ölkələrimizin hər birində (RF, İran, Azərbaycan) bu karbohidratların istehsalının çox olmasına baxmayaraq, qəribədir ki, daxil logistikanı nəzərdə tutaraq, bu xammalın bir-birimizə nəqlinə maraq var", deyə Rusiya dövlət başçısı Rusiya-Azərbaycan-İran danışıqlarının yekunlarına görə jurnalistlərə bildirib.

Üç ölkə liderinin növbəti sammiti 2018-ci ildə Moskvada keçiriləcək. -06D-