Mövlam Şıxəliyev və əlaltıları hərbi rütbələrdən və mükafatlardan məhrum ediliblər

Bakı/24.07.23/Turan: Azərbaycan prezidenti İlham Əliyev 2015-ci ildə ləğv edilmiş Milli Təhlükəsizlik Nazirliyinin İstintaq İdarəsinin keçmiş rəisi Mövlam Şıxəliyevin barəsində ittiham hökmünün qüvvəyə minməsilə əlaqədar onun general-mayor rütbəsindən və dövlət mükafatlarından məhrum edilməsi barədə sərəncam imzalayıb.

Şıxəliyevin tabeliyində olan və onunla birlikdə mühakim edilən Sahib Ələkbərov və Yasin Məmmədov da hərbi rütbələrdən və mükafatlardan məhrum ediliblər.

21 sentyabr 2022-ci ildə Bakı Ağır Cinayətlər keçmiş Milli Təhlükəsizlik Nazirliyinin bir qrup yüksək vəzifəli zabitinə hökm oxunub.

Milli Təhlükəsizlik Nazirliyinin İstintaq İdarəsinin keçmiş rəisi, general-mayor Mövlam Şıxəliyev 12 il müddətinə azadlıqdan məhrum edilib. Onun müavini Yasin Məmmədov 10,5 il müddətinə mühakimə edilib. İstintaq İdarəsinin 2-ci şöbəsinin keçmiş rəisi Vüsal Ələkbərov 11 il 2 ay həbs cəzası alıb, həmin idarənin kriminalistika  şöbəsinin rəis müavini Sahib Ələkbərov -8 il mühakimə edilib.

İş üzrə fiqurantlar Cinayət Məcəlləsinin 182.3.1, 182.3.2 (külli miqdarda əmlakın alınması məqsədilə mütəşəkkil qrup tərəfindən tələb etmə), 294.3 (sübutların saxtalaşdırılması), 311.3.1 (qabaqcadan əlbir olmuş bir qrup şəxs tərəfindən rüşvət alma) və digər maddələrilə təqsirli biliniblər.

Onların hamısı təhdid yolu ilə iş adamlarından pul tələb etməkdə və onların ümumilikdə 17 milyon manatlıq əmlaklarını mənimsəməkdə təqsirli bilinib.

Məhkəmə Mövlam Şıxəliyevin daşınmaz əmlakının müsadirə edilməsinə qərar verib. 16B06