M.Saakaşvili: Bakı-Qars layihəsinə qarşı çıxmaq cinayətdir

Azərbaycan və Gürcüstan prezidentləri – İlham Əliyev və Mixail Saakaşvili fevralın 27-də təkbətək və geniş tərkibli danışıqları başa çatdıqdan sonra mətbuat üçün bəyanatla çıxış ediblər.

“Müstəqillik illərində Gürcüstan və Azərbaycan strateji müttəfiqlik səviyyəsinə çatıb. Bu gün bu müttəfiqlik münasibətləri inkişaf edir və möhkəmlənir. Əminəm ki, qarşıdakı illərdə bu əlaqələrin inkişafının hər iki ölkə üçün böyük əhəmiyyəti olacaq”, deyə Əliyev bildirib.

O, hər iki ölkəni gücləndirən və regionda gedən proseslərə müsbət təsir göstərən energetika və nəqliyyat sektorlarında əməkdaşlığı xüsusi qeyd edib. O, yeni TANAP qaz kəməri layihəsinin Azərbaycan, Gürcüstan, Türkiyə və Avropa üçün böyük imkanlar açacağından əminliyini bildirib.

Bakı-Tbilisi-Qars dəmir yolunun tikintisi məsələsinə toxunan Əliyev layihənin uğurla başa çatdırılacağından əminliyini ifadə edib. 

Əliyev Gürcüstanda Saakaşvilinin rəhbərliyi ilə həyata keçirilən islahatlara yüksək qiymət verib.

Öz növbəsində, Saakaşvili bildirib ki, Gürcüstanda hakimiyyətdə kimin olduğundan asılı olmayaraq, Azərbaycanla dostluq davam edəcək. “Gürcüstana Azərbaycandan daha yaxın dövlət tapmaq olmaz. Son illər heç bir ölkə Gürcüstan üçün Azərbaycanın etdiklərini etməyib, bizə Azərbaycan qədər dəstək göstərməyib”, deyən Saakaşvili Əliyevin şəxsi rolunu qeyd edib.

Daha sonra o, Bakı-Tbilisi-Qars dəmir yolunun tikintisinin başa çatdırılmasının əhəmiyyətini qeyd edərək, onu “inqilabi layihə” adlandırıb.

Bu layihəyə istənilən maneələr milli maraqlarımıza ziddir. Buna görə bu layihəni sual altına qoymaq cinayətdir. Layihəyə qarşı çıxmaq bizim milli maraqlarımıza xəyanətdir. Şübhə etmirəm ki, bu layihə Avropaya və NATO-ya gedən yolumuzdur və o, yekunlaşacaq. Bizim tərəfdaşımız və dostumuz Türkiyə də bunda mühüm rol oynayır”, deyə Saakaşvili bildirib.

Qeyd edək ki, yeni baş nazir İvaişvili və onun hökumətinin üzvləri BTQ layihəsinin səmərəliliyini şübhə altına qoyub. -06D-