Mübariz Mənsimov FETÖ ilə əlaqədə ittiham olunaraq həbs edilib

İstanbul/17.03.20/Turan: Türkiyənin tanınmış iş adamı Mübariz Mənsimov FETÖ təşkilatının (Fətullah Gülənin terror təşkilatı) fəaliyyətinin araşdrırılması çərçivəsində İstanbulda həbs edilib.Türkiyə hakimiyyətinə yaxın olan “Sabah” qəzetinin məlumatına görə, biznesmen FETÖ-nün top-menecerləri  Akın İpek, Suat Yıldırım, Süleyman Uysal ilə yaxın əlaqələrdə ittiham olunur.

İstintaq həmçinin M.Mənsimovu təşkilatın rusiyalı imamı Əhməd Hamdi Vural ilə əlaqələrdə ittiham edib.

Rəsmi məlumatlardan belə çıxır ki, biznesmenə qarşı irəli sürülən iddialar deklarativ xarakter daşıyır. Belə ki, M.Mənsimovun saxlanması və ofisində axtarış aparılması İstanbul prokurorluğunun Maliyyə Cinayətləri İdarəsinin əməkdaşları tərəfindən həyata keçirilib. Lakin maliyyə oğurluğu və ya dələduzluq barədə məlumatların əvəzinə istintaq M.Mənsimovun adı çəkilən şəxslərlə “intensiv telefon əlaqələri”ni bildirir.

“Sabah” qəzeti “inandırıcı sübutlar” kimi bildirir ki, M.Mənsimov FETÖ ilə əlaqələrinə görə Rusiyada qapadılmış Atlantik Beynəlxalq Məktəbinin Direktorlar Şurasına daxildir.

İstintaq digər bir “sübut” kimi bildirib ki, Əhməd Vural M.Mənsimovun ofisinə tez-tez gəlirmiş və həmin vaxt həmsöhbətlər “dinləməni bloklayan qurğunu işə salırmışlar”.

Daha sonra iş adamının FETÖ liderləri ilə “intensiv” yazışmaları və birgə səyahətləri haqda məlumat verilir.

Bütün bu məlumatlar M.Mənsimovu həbs etmək üçün İstanbul məhkəməsinə əsas verib.

Biznesmenə qarşı hansı ittihamların irəli sürüldüyü və onun hansı maddə ilə həbs olunduğu qəzetin məlumatından aydın olmur. Ancaq  onun yaxın çevrəsi ittihamların siyasi sifariş olduğunu bildirib.

*Azərbaycan və Türkiyə vətəndaşı Mübariz Mənsimov (1968-ci ildə anadan olub) sərvətinə görə Türkiyədə 7-cidir, onun  kapitalı 1,3 mlrd. dollar dəyərində qiymətləndirilir. 170 tankerə sahib olan və hər il dünyanın onlarla ölkəsinə 100 mln. tona yaxın neft daşıyan “Palmali” gəmiçilik şirkətinin yeganə sahibidir.

Bir müddət öncə M.Mənsimov ilə SOCAR Dövlət Neft Şirkəti arasında münaqişə yaranıb və o bu barədə mətbuata məlumat verib. Bundan əlavə, Azərbaycan hakimiyyətinin siyasətinin müxtəlif aspektlərini tənqid edib ki, bu da rəsmi Bakını qıcıqlandırıb.

Bundan sonra M.Mənsimovun Azərbaycandakı bir çox aktivi ləğv edilib.

Qeyd edək ki, M.Mənsimovun saxlanması ərəfəsində Azərbaycan və Türkiyə prezidentləri arasında telefon danışığı olub. -02B-