Müsavat Partiyası bələdiyyiə seçkilərinin nəticələrini tanımır

Çərşənbə günü Müsavat Partiyasının ofisində bələdiyyə seçkilərinin nəticələrinə dair mətbuat konfransı keçirilib.

Partiya sədrinin müavini Gülağa Aslanlı 23 dekabr -bələdiyyə seçkilərini “seçki oyunu” və “seçicilərsiz seçkilər” kimi dəyərləndirib. 8 seçki məntəqəsində olduğunu deyən G.Aslanlı bu məntəqələrdə bir nəfər belə seçiciyə rast gəlmədiyini nəzərə çatdırıb.

Daha sonra hüquqşünas Elman Fəttah bələdiyyə seçkilərinin nəticələrinə dair partiyanın ilkin rəy-hesabatını açqılayıb. O qeyd edib ki, Müsavat Partiyası seçkilərdə iştirak barədə qərar verməyib. Buna səbəb kimi ölkədə demokratik seçki mühitinin olmaması, seçki komissiyalarının hakimiyyətin total nəzarətində olması, xalqın bu seçkilərə maraqlı olmaması göstərilib.

Partiya olaraq seçkilərə qatılmadıqlarını deyən E.Fəttah buna baxmayaraq, seçkiləri müşahidə etməkdən kənarda qalmadıqlarını vurğulayıb və 300 seçki məntəqəsində müşahidələr apardıqlarını nəzərə çatdırıb. Səsvermə günü məntəqələrdə müşahidəçilərin olmaması, “karusel” əməliyyatına yol verilməsi, bülletenlərin topa şəklində qutulara salınması, qutuların əvvəlcədən bülletenlərlə doldurulması, arzuolunmaz namizədlərin səslərinin sayılmaması kimi halların olduğunu bildirib.      

Seçiyə qədərki proseslərdə də pozuntular olub. Belə ki, Müsavat Partiyasından bir xeyli partiyaçı bələdiyyə üzvlüyünə namizədliyini irəli sürüb, amma qanunsuz yollarla  onların namizədliyi qeydə alınmayıb.

Hakim Yeni Azərbaycan Partiyasından isə 15 min nəfərə yaxın namizəd qeydə alınıb. Bu fakta görə E.Fəttah bələdiyyə seçkilərini “birpartiyalı seçki” adlandırıb.   

Bundan əlavə, bələdiyyə üzvlərinin icra hakimiyyətlərinin siyahısı əsasında “seçiləcəklərinin” hələ seçkiyə qədər bəlli məsələ olmasına işarə edilib. Bu faktın parlamentdə deputatların biri tərəfindən səsləndirilməsinə diqqət çəkilib.

E.Fəttah inanılmaz olsa da əhali arasında şəhər, rayon, kənd bələdiyyələri üzvü olmaq istəyənlərdən yüksək məbləğdə rüşvətin yığılması barədə iddiaların odluğunu nəzərə çatdırıb.

“Müsavat Partiyası bələdiyyə seçkilərinin kütləvi saxtakarlıq şəraitində keçdiyini bidirərək bu seçkilərin nəticələrini tanımadığını bəyan edir”, - E.Fəttah məınsub təmsil etdiyi partiyanın mövqeyini açıqlayıb.-05C-