Müsavat Partiyası iqtidarın təzyiq siyasətini pisləyib

Müsavat Partiyası rəsmi Bakının siyasi qurum və fəallara qarşı təzyiqlərinə etiraz bəyanatı yayıb. 

Sənəddə prezident seçkiləri kampaniyası dövründə siyasi məhbuslara, fəal siyasi  gənclərə, müstəqil vəkillərə, ictimai -siyasi qurumlara rəsmi Bakının təzyiqlərinin davam etdiyi nəzərə çatdırılır. 

Müsavat Partiyasının funksoneri Tofiq Yaqublunun, partiya başqanını müşaviri Yadigar Sadıqlının, prezidentliyə namizəd İlqar Məmmədovun həbsi və onlara qarşı ittihamlar əsassız, uydurma adlandırılır. Bu şəxslərə qarşı istintaq hərəkətlərində “ağlabatan müddət” tələbinin tanınmaması prosesinin davam etməsinə diqqət çəkilir. 

Müəllflərin fikrincə, bu şəxslər hər hansı cinayəti törətməyiblər, sadəcə, siyasi fəallıqlarına görə rəsmi Bakının girovlarına dönüblər. 

Tanınmış vəkil Aslan İsmayılovun vəkillik statusunun məhkəmə tərəfindən ləğvinə də münasibət ifadə edilir. Onun siyasi motivlərlə həbs edilənləri müdafiə etdiyinə görə siyasi sifarişlə vəkillikdən uzaqlaşdırıldığı qeyd olunur. 

Müəlliflər siyasi məhbuslara, müstəqil vəkillərə və gənclərə qarşı həyata keçirilən bu hərəkətləri seçki kampaniyası dövründə siyasi repressiyaların davamı kimi dəyərləndirirlər. Bununla rəsmi Bakının demokratiya uğrunda mübarizə aparan insanların mübarizə əzmini qırmaq cəhdi önə çəkilir. Amma iqtidara bu səylərin nəticə verməyəcəyi bildirilir. Son olaraq müəlliflər iqtidarı seçki kampaniyası dövründə repressiyalara son qoyulmasına, bu halları törədənlərin  qanunla cəzalandırılmasına çağırırlar.-05D-