Müxalifət özünü seytnot vəziyyətinə salır (YENİLƏNİB)

 Demokratik Qüvvələrin Milli Şurasının (DQMŞ) iclası uzun sürən müzakirələrdən sonra sonadək Rüstəm İbrahimbəyovun namizədliyinin dəstəklənməsini qərara alıb.

Lakin onun Rusiya vətəndaşlığının ləğv edilməməsi ilə əlaqədar qeydiyyata alınmasının mümkünsüzlüyü nəzərə alınaraq başqa variantlar da irəli sürülüb.

Variantlardan biri əlavə vahid namizədin irəli sürülməsi olub. İkinci variant DQMŞ-yə daxil olan siyasi partiyalar tərəfindən  namizədlərin irəli sürülməsi və yekun mərhələdə onlardan birinin dəstəklənməsi olub.

Yekunda birinci variantı DQMŞ-nin 43 üzvü, ikinci variantı 42 üzvü dəstəkləyib. Bu barədə DQMŞ aparatının rəhbəri Eldar Namazov bildirib.

Onun sözlərinə görə, yaxın günlərdə məsləhətləşmələrdən sonra vahid namizəd müəyyən olunacaq və R.İbrahimbəyov qeydiyyata alınarsa həmin şəxs namizədliyini geri götürmək barədə öhdəlik götürəcək. 

Qeyd edək ki, qeydiyyat üçün namizədlərə imza vərəqələrinin verilməsinin müddəti 9 sentyabr 2013-cü ildə bitir.

Beləliklə, MŞ-nin 20 gün vaxtı qalır. Eyni zamanda əlavə namizədin nə zaman irəli sürüləcəyi də bəlli deyil. Namizəd irəli sürüldükdən sonra MSK-da 5 gün ərzində onun təsdiqlənməsi məsələsinə baxılacaq. 

R.İbrahimbəyov isə sessiya iştirakçılarına müraciət edərək istənilən qərara hörmətlə yanaşacağını bildirib.—06D-

2013 Avqust 19 (Bazar ertəsi) 19:01:00

Demokratik Qüvvələrin Milli Şurası (DQMŞ) seçkilərdə iştirak taktikasına dair qərarla bağlı müzakirələri davam etdirirlər. Bazar ertəsi saat 15.00-da başlayan müzakirələr 19:00-a qədər davam edib. Müxtəlif variantlar müzakirə olunub. Bunlardan biri Rüstəm İbrahimbəyovun vahid namizədliyinin saxlanması və R.İbrahimbəyov qeydə alınmasa, ehtiyat namizədin irəli sürülməsidir. İkinci variant digər müxalifət liderlərinin namizədliyinin irəli sürülməsini nəzərdə tutur. 

R.İbrahimbəyovun namizədliyi qeydiyyata alınmasa, hamı seçkilərə gedəcək və son anda onlardan biri DQMŞ-nin vahid namizədi kimi tanınacaq, digərləri isə öz namizədliklərini geri götürəcək. 

Xatırladaq ki, R.İbrahimbəyovun Rusiya vətəndaşlığının ləğv olunmaması onun seçkilərdə iştirakına əngəl törədir. Digər tərəfdən, hakimiyyət R.İbrahimbəyovun rəhbərlik etdiyi Kinematoqrafçılar İttifaqına qarşı vergidən yayınma ittihamı ilə cinayət işi qaldırıb. Bundan əlavə, Nərimanov bələdiyyəsi təşəbbüs qrupunun R.İbrahimbəyovun prezidentliyə namizədliyinin irəli sürülməsi ilə bağlı iclasının protokolunu təsdiqləmir. Bu səbəbdən R.İbrahimbəyovun sənədlərini MSK-ya təqdim etmək mümkün  deyil.—06D-