Müxalifət seçkiqabağı təşviqat zamanı bərabərlik prinsipinin pozulması barədə

Bakı/27.01.20/Turan:  Parlament seçkiləri ilə bağlı seçki kampaniyasının təbliğat-təşviqat mərhələsində bərabərlik prinsipi nəinki qorunmur, əksinə, daha da pozulur. Müsavat Partiyası Seçki Qərargahının sədri Gülağa Aslanlı belə hesab edir. 

Onun fikirncə, hakimiyyətin dəstəklədiyi namizədlərlə görüşlər dövlət orqanları tərəfindən təşkil edilir və bu bir çox dairələrdə belə hallar baş verir . Ancaq müxalifət namizədlərinin seçicilərlə görüşlərinə, məsələn, Müsavat rəhbərliyinin yanvarın 26-da Biləsuvar və Cəlilabadda seçicilərlə görüşlərinə maneçilik törədilir.

Partiya namizədlərinin plakatları bilərəkdən cırılır, ancaq buna görə heç kim cəzalandırılmır.

REAL Partiyasının icra katibi Natiq Cəfərli isə vurğulayır ki, bu seçkilərdə diqqət çəkən məsələ televiziyaların seçki prosesindən və onun təbliğat-təşviqat mərhələsindən kənarda qalmasıdır və bu hal ilk dəfə baş verir. 

Bundan irəli gələrək əsas təbliğat yerlərdə insanlarla canlı görüşlərdə və sosial şəbəkələr vasitəsilə aparılır.  “REAL Cümhuriyyətçilər Ittifaqi” namizədlərinin təbliğat plakatları çırılır.

Hakimyyət namizdlərinin görüşlərinin təşkilində inzibati resurslardan istifadə olunur.

“İnzibati resurs hesabına hakimiyyətyönlü namizədlə görüşə gələn insanların çoxu həmin dairənin seçiçiləri olmur, hərəsi bir dairənin seçiçiləridir. Odur ki, hakimiyyətin belə köhnə üsuldan istifadə etməsi üzücüdür”, - N.Cəfərli deyib.    

Vətəndaş Təşəbbüsləri İnstitunun rəhbəri, seçki eksperti Bəşir Süleymanlı hesab edir ki, əvvəlki seçkilərlə müqayisədə indi “bütün namizədlərə bərabər təbliğat və təşviqat prinsipi” pozulması halları azdır. 

Lakin pozuntular var. Seçicilərin hakimiyyət namizədlərinin lehinə ələ alınması barədə məlumatlar var. Bu namizədlər namizədliklərini irəli sürdükləri yerlərdə su borularının və yolların çəkilməsində iştirak edirlər. Bəzi hallarda namizədlər belə hallar ilə bağlı sosial şəbəkələrdə məlumat verirlər, bu isə ciddi qanun pozuntusudur.

MSK katibi Mikayıl Rəhimov isə deyib ki, parlament seçkilərinin təbliğat-təşviqat mərhələsində MSK-nın bütün namizədlərə “bərabər təbliğat və təşviqat prinsipi”nin pozulmamasına tam nəzarət  etmək imkanı yoxdur.

“Hansısa dairədə belə problem yaranıbsa namizəd və ya namizədlər onu çəkinmədən Dairə Seçki Komisssiyasına (DSK), MSK-ya bildirməlidirlər”, - o deyib.

MSK katibi indiyədək namizədlərdən heç kimin şikayətlə müraciət etmədiyini söyləyib. —06D-