Müxalifət təmsilçiləri həmməruzəçilərlə görüşü mənasız adlandırırlar

Bakıda səfərdə olan AŞPA-nın Azərbaycan üzrə həmməruzəçiləri Pedro Aqramunt və Jozef Qreş çərşənbə axşamı ölkənin bir qrup ictimai-siyasi qüvvələrinin təmsilçilərilə görüşüblər. 

Demokrat Partiyasının sədri Sərdar Cəlaloğlu həmməruzəçilərlə görüşdə Azərbaycanda prezident seçkiləri, siyasi məhbus, demokartiya məsələləri müzakirə obyekti olub. Müxalifət nümayəndələri ölkədə prezident seçkilərinin nöqsanlı keçdiyini desələr də, həmməruzəçilər bu qiymətlə hesablaşmayaraq, seçkilərin yüksək səviyyədə keçdiyini iddia ediblər. Siyasi məhbuslar haqda danışıldıqda həmməruzəçilər partiya və ictimai hərəkat mənsublarından siyahı tələb ediblər. 

“Belə görüşlər artıq formal xarakter daşıyır, AŞ administrasiya kimi mahiyyətini itirib, demoralizə olub”, - deyə S.Cəlaloğlu belə görüşlərin mənasızlığına diqqət çəkib.

Klassik Xalq Cəbhəsi Partiyasının sədri Mirmahmud Mirəlioğlu da görüşdə ölkə reallıqlarının müzakirə olunduğunu nəzərə çatdırıb. Seçkinin qüsurlu olması ilə bağlı sənədlər təqdim edilməsinə baxmayaraq, həmməruzəçilər partiya liderlərinə seçkilərdə manipulyasiya olub-olmaması sualı ilə müraciət edib. “Fikrimcə, artıq belə görüşlərə ehtiyac yoxdur, biz məsələni necə anlatsaq da, bu şəxslər öz bildikləri kimi təqdim edirlər, hakimiyyətlə işbirliyindədirlər”, deyə M.Mirəloğlu belə görüşlərin bir mahiyyəti olmadığını qeyd edib.  

Görüşə Demokrat, Azad Demokrat, Klassik Xalq Cəbhəsi, Xalq Cəbhəsi partiyalarının və REAL Hərəkatının təmsilçiləri qatılıblar.

Müsavat Partiyasından adının çəkilməsini istəməyən mənbə partiyanın görüşə dəvətli olduğunu, amma dəvəti partiyaya yetirməli olan şəxsin bunu etməməsi üzündən qatıla bilmədiklərini nəzərə çatdırıb. -05B-