Naxçıvandan təzadlı xəbərlər: Müdafiə Nazirliyi döyüşlərlə bağlı məlumatları təkzib edir

Bəzi KİV-lər Naxçıvanın Ermənistanla sərhəddə yerləşən Sədərək, Culfa və Şahbuz rayonunda Ermənistan Ordusu ilə şiddətli döyüşlər getdiyini yazır. Bu KİV-lər mülki mənbələrə istinadən bildirir ki, ermənilər Culfanın Ləkətağ yüksəkliyini ələ keçirib və post qurublar.

Azərbaycan Müdafiə Nazirliyinin mətbuat xidmətindən Turan-a bildiriblər ki, yayılan məlumatlar yalandır və əsası yoxdur. “Naxçıvan istiqamətində vəziyyət sabitdir. Azərbaycanda əməliyyat şəraiti Silahlı Qüvvələrimizin tam nəzarəti altındadır”, deyə mətbuat xidmətindən bildiriblər.

Öz növbəsində, yerli sakinlər Turan-ın müxbirinə Ləkətağ istiqamətində dünən gecə və bu gün səhər saatlarında atəşkəsin pozulduğunu bildiriblər. “Biz iki saatdan çox avtomat və pulemyotların intensiv atəşini eşitdik”, deyə sakinlərdən biri qeyd edib.

Eyni zamanda, atəş səsləri regiona yaxın bütün ərazilərdə eşidilib. -03B-