Naxçıvanın keçmiş daxili işlər naziri həbs edilib

Bakı/09.03.21/Turan: Naxçıvan Muxtar Respublikasının (NMR) keçmiş daxili işlər naziri general-leytenant Əhməd Əhmədov həbs edilib. Azərbaycan Baş Prokurorluğundan Turan-a bu məlumatı təsdiq ediblər.

İdarədən həmçinin qeyd ediblər ki, Əhmədov barəsində istintaq prokurorluq orqanları tərəfindən aparılır. Amma onun konkret olaraq nədə ittiham olunduğunu açıqlamayıblar.

KİV-də yayılan məlumatlara görə, Əhmədov pul vəsaiti mənimsəməkdə ittiham olunur. CM-in bu maddəsi üzrə təhqiqat prokurorluq orqanları tərəfindən aparılır.

Əhmədov 17 il DİN başçısı vəzifəsini tutub və muxtar respublikanın ən mənfur məmurlarından biri hesab olunurdu. Onun adı yerli hüquq müdafiəçilərinin və jurnalistlərin təqibi ilə bağlı qalmaqallarda hallanırdı.

Əhmədov 2017-ci ildə vəzifədən kənarlaşdırılıb. Ondan bir il əvvəl Naxçıvan MTN rəhbəri Vəli Əsgərov vəzifəsindən kənarlaşdırlıb, daha sonra isə həbs edilib. O, “böyük ölçüdə mənimsəmə və ya israf”, “vəzifə səlahiyyətlərindən sui-istifadə” və “vəzifə səlahiyyətlərini aşma” maddələri ilə 14 il müddətinə azadlıqdan məhrum edilib.

Əhmədova gəlincə, qeyri-rəsmi məlumatlara görə, o, qardaşı Əvəz Əhmədova borcu olan şəxsləri qanunsuz olaraq azadlıqdan məhrum etməkdə ittiham olunur. Əvəz Əhmədov da həbs edilib və hədələmə və qanunsuz olaraq azadlıqdan məhrum etməkdə ittiham olunur. -06В-