Novruz Məmmədov: Qəbələ RLS-in icarə müddətinin uzadılmasına etirazımız yoxdur, amma şərtlər dəyişməlidir

Azərbaycan Rusiyanın Qəbələ RLS-in icarəsini davam etdirməsinə etiraz etmir, amma Moskva bu regionun inkişaf perspektivlərini diqqətə almalıdır. Bu barədə Sunxua agentliyinə Azərbaycan Prezident administrasiyasının xarici əlaqələr şöbəsinin müdiri Novruz Məmmədov bildirib.

“Qəbələ RLS Rusiyaya həqiqətən lazımdırsa və onlar əməkdaşlıq etmək istəyirlərsə, Azərbaycan buna etiraz etmir. Lakin bu məsələni real vəziyyətlə uyğunlaşdırmaq lazımdır”, deyə o qeyd edib.

Məmmədovun fikrincə, RLS-in yerləşdiyi Qəbələ rayonunun turizmin, kənd təsərrüfatının və digər sahələrin inkişafı üçün böyük perspektivləri olduğunu nəzərə almalıdırlar.

Qeyd edək ki, RLS 52 ha ərazini əhatə edir və orada minə yaxın rus hərbiçisi xidmət edir, üstəgəl onların ailə üzvləri. Yayın əvvəllərində stansiya komandanlığı ailə üzvlərinə Rusiyaya qayıtmağı təklif edib, bu da hərbiçilərin ailələrinin narazılığına səbəb olub və hərbiçilərin həyat yoldaşları Vladimir Putinə açıq məktub yazıblar.

Novruz Məmmədovun turizmin perspektivləri ilə bağlı qeydlərinə gəlincə, RLS ekologiyaya mənfi təsir göstərir və uşaqlarda onkoloji xəstəliklərin mənbəyidir. Təsadüfi deyil ki, bu zonada uşaqlarda leykemiya xəstəliyinin səviyyəsi ümumilikdə Azərbaycan üzrə olduğundan 6-7 dəfə yüksəkdir.

* Azərbaycanın Qəbələ rayonunda yerləşən və 1985-ci ildə istismara verilmiş “Daryal” tipli RLS keçmiş SSRİ-nin raket əleyhinə müdafiə kompleksinin 8 stansiyasından biri idi. Stansiya 6000 km radiusda əraziyə nəzarət etmək imkanı verir.

Azərbaycanın mülkiyyəti olan stansiya 2002-ci ildə imzalanmış müqavilə əsasında 2012-ci ilədək Rusiyaya icarəyə verilib. İcarə haqqı ildə 7 mln. dollar təşkil edir. Rusiya və Azərbaycan ötən ildən etibarən icarə müddətinin uzadılması haqqında danışıqlar aparır, amma bu danışıqlar nəticə vermir. Bir sıra Rusiya KİV-lərinin məlumatına görə, Azərbaycan əvvəlcə Rusiyadan illik 15 mln. dollar icarə haqqı istəyirdi, sonradan tələb olunan məbləği 150 mln. dollara, son vaxtlar isə 300 mln. dollara qədər qaldırdı. 

Rusiyanın bu stansiyanı icarə müddəti 2012-ci ilin dekabrında başa çatır, lakin müqavilənin uzadılması haqqında prinsipial razılıq bu tarixdən 6 ay əvvəl əldə edilməlidir. -02D-