Obama Ağ Evdə iftar verib

ABŞ prezidenti Barak Obama çərşənbə axşamı Ağ Evdə iftar təşkil edib, xəbəri AP yayıb.

Obama Amerika müsəlmanlarını millətin inkişafına verdikləri töhfəyə görə alqışlayıb.

Ramazan “düşünmək vaxtı, ibadət və oruc vasitəsilə Allaha sədaqəti nümayiş etdirmək imkanıdır, amma bu ay həm də ailə və dostlar üçün birlikdə toplaşmaq vaxtıdır”.

Ağ Evdə müxtəlif konfessiyaların müqəddəs günlərini qeyd etmək ənənəsi var və bu müxtəliflik dini etiqad azadlığını təsdiq edir.

“Biz daha yüksəklərə qalxmaq və övladlarımız və gələcək nəsillərimiz üçün daha böyük imkanlar yaratmağa çalışırıq”, deyə Obama bildirib. – “Əlbəttə, bu, təkcə Amerikanın arzusu deyil, bütün dünyadakı insanların səyləridir”.

İqtisadi azadlıq və imkanlar arzusu da siyasi azadlıq kimi son bir neçə ildə bütün dünyada, o cümlədən Şimali Afrika və Yaxın Şərqdə baş verən bir çox dəyişikliklərin əsasında durur, deyə prezident qeyd edib.

İftarda həmçinin administrasiya üzvləri, konqresmenlər və senatorlar, dini liderlər, diplomatik korpus üzvləri iştirak ediblər. -0-