Ombudsmanın nümayəndələri Hafiz Babalıya baş çəkiblər

Martın 28-də ombudsman aparatının təmsilçiləri jurnalist Hafiz Babalının yazılı müraciəti ilə Bakı İstintaq Təcridxanasında onunla görüşüblər.
Babalının yaxınlarının verdiyi məlumata görə, görüşdə Hafiz Babalı saxta ittihamla həbs edildiyini, həbsinin jurnalist fəaliyyətindən qaynaqlandığını və siyasi xarakterli olduğunu vurğulayıb. O, konkret faktlara istinad etməklə istintaqın qərəzli aparıldığını diqqətə çatdırıb və bu səbəbdən dərhal azad olunması üçün insan hüquqları üzrə müvəkkili əlində olan vasitələrdən istifadə etməyə çağırıb.
Aparatın nümayəndələri Hafiz Babalının saxlanma şəraiti ilə maraqlanıblar. 3-cü qrup gözdən əlil Hafiz Babalı 13 dekabr 2023 tarixində saxlanılarkən ondan götürülmüş gün eynəyinin qaytarılmasını xahiş edib. Məsələnin müsbət həllinə söz verilib.

Ombudsman Aparatının mətbuat xidmətindən Turan-a martın 28-də Ombudsman yanında Milli Preventiv Qrupun üzvləri tərəfindən İstintaq Təcridxanasına başçəkmə zamanı Babalı ilə görüş keçirildiyini təsdiq ediblər.

"Milli Preventiv Qrupun üzvləri Hafiz Babalının müraciəti əsasında ona baş çəkiblər və onu dinləyiblər", deyə mətbuat xidmətindən bildiriblər. 

* Turan Agentliyinin "iqtisadi xəbərlər" şöbəsinin redaktoru Hafiz Babalı dekabrın 13-də saxlanılıb. Ona qarşı "xarici valyuta qaçaqmalçılığı" ittihamı irəli sürülüb. O, məhkəmənin qərarı ilə üç ay müddətinə ilkin həbs cəzasına məhkum edilib. Babalı "Abzas Media"nın işi üzrə cəlb edilib. Hüquq müdafiəçiləri onu siyasi məhbus kimi tanıyıblar.