Oqtay Əsədov: Ermənistan KİV-ləri Fransua Ollandın sözlərini təhrif ediblər

Bu gün Milli Məclisin iclasında Fransa prezidenti Fransua Ollandın Dağlıq Qarabağ münaqişəsi ilə bağlı çıxışı kəskin  tənqid olunub.

Son günlər erməni KİV-ləri Ollandın Fransadakı erməni diasporu üzvləri ilə görüşdə Qarabağ münaqişəsinin xalqların öz müqəddəratını təyin etmək hüququ prinsipi əsasında həll olunmalı olduğunu bildirdiyi barədə məlumat yayıblar.

Millət vəkili Azay Quliyev bildirib ki, F.Ollandın bu bəyanatı Ermənistanın işğalçı siyasətinə və separatçı rejimə verilən açıq dəstəkdir. O, Parisə etiraz notası göndərməyi tələb edib. “Fransua Ollandın bu bəyanatının ATƏT-in Minsk qrupunun həmsədri kimi Fransanın daşıdığı mandata uyğun olmadığı bildirilməlidir”, deyə o qeyd edib.

Amma spiker Oqtay Əsədov bildirib ki, erməni KİV-ləri Ollandın fikrini təhrif ediblər. Onun sözlərinə görə, Parlamentin beynəlxalq münasibətlər komitəsinin sədri Səməd Seyidov Fransa rəsmiləri ilə əlaqə saxlayıb və məlum olub ki, Ollandın sözləri erməni mətbuatında təhrif olunub.

Əsədovun sözlərinə görə, Olland "Madrid prinsipləri"nə istinadən "öz müqəddəratını təyin etməyin yalnız ərazi bütövlüyü əsasında mümkün olduğunu" deyib. -16D-