Partiya məhkəmələri siyasi sifariş yerinə yetimrəkdə ittiham edir

Müsavat Partiyası çərşənbə günü siyasi məhbusların məhkəmə prosesi ilə bağlı bəyanat yayıb. 

Müəlliflər noyabrın 4-5-də Şəkidə, Bakıda və Lənkəranda siyasi sifariş əsasında baş verən üç məhkəmə prosesinə diqqət çəkirlər.   

Şəki şəhərində bu ilin yanvarında İsmayıllı hadisələrində təqsirli bilinən rayonun 18 nəfər sakini, o cümlədən Müsavat Partiyası başqanının müavini, “Yeni Müsavat” qəzetinin köşə yazarı Tofiq Yaqublu, “REAL” Hərəkatının rəhbəri İlqar Məmmədova qarşı ittiham üzrə proses keçirilir. Sənəddə 18 nəfərin yaxın qohumlarının, jurnalistlərin məhkəmə zalına buraxılmaması prosesin yarımqapalı halda keçirilməsi kimi dəyərləndirilir. Hakim Rəşid Hüseynov iclası prosessual qanunvericiliyin tələblərini pozaraq idarə etməkdə ittiham olunur.  

“NİDA” Vətəndaş Hərəkatı və Azad Gənclik Hərəkatı üzvlərinin Bakı şəhərində keçirilən məhkəməsində də zala müttəhimlərin valideyn və vəkillərinin buraxıldığı qeyd olunur. Sənəddə məhkəmə prosesilə bağlı çəkiliş aparan “Meydan TV”nin xanım əməkdaşına zor tətbiq olunması, məhkəməyə yaxın ərazilərdə fəaliyyət göstərən iaşə müəssisələrinin zorla bağlatdırılması nəzərə çatdırılır.  

Müsavat Partiyası başqanının müşaviri Yadigar Sadıqovun Lənkəran rayon məhkəməsində hazırlıq iclası açıq keçirilsə də, mətbuat nümayəndələrinin video-foto çəkməsinə icazə verilməyib. 

Bununla yanaşı, müəlliflər hazırlıq iclaslarında müttəhimlərin və vəkillərinin qaldırdıqları vəsatətlərin təmin olunmamasını xüsusi vurğulayaraq, bunu məhkəmələrin sifarişli olması kimi dəyərləndirirlər. 

Ölkədə avtoritar siyasətin nəticəsi olaraq yaranan dərin siyasi, iqtisadi və sosial-mədəni böhranı etiraz edən insanları cəzalandırmaqla aradan qaldırmağın mümkünsüzlüyü vurğulanır. İqtidardan saxta ittihamlarla günahsız həbs edilən bütün siyasi məhbusların azad olunması tələb edilir. -05D-