Paşinyanın Qarabağ ermənilərini danışıqlar prosesinə cəlb etmək cəhdinin arxasında nə durur?

Bakı/07.06.18/Turan: Qarabağ məsələsi ilə bağlı danışıqlar münaqişənin tamhüquqlu tərəfinin - Qarabağ ermənilərinin iştirakı olmadan yararlı və səmərəli hesab oluna bilməz. Bu barədə iyunun 7-də Ermənistan parlamentinin iclasında çıxış edən baş nazir Nikol Paşinyan bildirib.

"Qarabağın danışıqlarda iştirakı 1994-cü ildə ATƏT-in Budapeşt sammitində təsdiq edilib. 1998-ci ildən sonra Ermənistan nümayəndələri Qarabağın adından da danışıqlar aparırdılar: onların düz edib etmədiyi başqa bir məsələdir.

Robert Koçaryan (ER ikinci prezidenti) daha əvvəl Qarabağın prezidenti, Serj Sarkisyan isə (ER üçüncü prezidenti) Qarabağın özünü müdafiəsinin təşkilatçılarından biri olub. Buna görə, onlar danışıqların aparılması üçün mandata malik ola bilərdilər.

Nə qədər istəsəm də, mən Qarabağ xalqının adından danışıqlar aparmaq mandatını özümə aid edə bilmərəm. Bunun üçün nə hüquqi, nə siyasi, nə mənəvi əsasım yoxdur", deyə Paşinyan bildirib.

Paşinyan Azərbaycan tərəfin danışıqlarda Qarabağın azərbaycanlı icmasının da iştirak etməli olduğu haqqında arqumentlərini əsassız adlandırıb, belə ki, Qarabağ münaqişəsindən əvvəl və sonra onlar Azərbaycan vətəndaşları idilər və belə də qalıblar.

"Bu, o deməkdir ki, Azərbaycan prezidenti İlham Əliyev onların adından da danışıqlar aparır, belə ki, onlar seçkilərdə iştirak ediblər. Qarabağ sakinləri isə Ermənistan hakimiyyətini seçməyiblər və Ermənistan hakimiyyəti onları təmsil edə bilməz. Onların öz səsi olmalıdır", deyə Paşinyan qeyd edib. O əlavə edib ki, ATƏT-in Minsk Qrupu çərçivəsində Əliyevlə danışıqlar aparmağa hazırdır.

Bu mövzu bu gün Moskvada Rusiya və Ermənistan XİN başçılarının birgə mətbuat konfransında da qaldırılıb.

Dağlıq Qarabağın bu regiondakı münaqişənin nizamlanması üzrə danışıqlarda iştirakı haqqında qərar Yerevan və Bakı arasında razılaşdırılmalıdır, deyə RF XİN başçısı Sergey Lavrov bildirib.

"Moskvanın mövqeyi dəyişməz olaraq qalıb: o, həmişə Dağlıq Qarabağ məsələsinin Azərbaycan və digər dövlətlərlə yanaşı, Ermənistanın da iştirakçısı olduğu ATƏT-in Misnk Qrupu vasitəsilə həlli mövqeyidir. Əminik ki, bu, ən optimal formatdır", deyə o bildirib.

Lavrov qeyd edib ki, danışıqların formatının dəyişdirilməsi haqqında bütün razılaşmalar Yerevan və Bakı arasında əldə olunur.

"Tərəflər hansısa mərhələdə Dağlıq Qarabağın yenidən danışıqlarda təmsil olunacağı barədə razılığa gəlsələr, bu, onların qərarı olacaq və biz bu qərara hörmət edəcəyik", deyə nazir qeyd edib.

Rəsmi Bakı Paşinyanın bugünki ifadələrinə reaksiya verərək, onları "qeyri-konstruktiv" adlandırıb.

"Biz Ermənistan rəhbərliyinin bu cür bəyanatlarını danışıqlar prosesinin pozulmasına və işğala əsaslanan status-kvonun qorunub saxlanmasına yönəlmiş qeyri-konstruktiv addım kimi qiymətləndiririk", deyə XİN-in mətbuat katibi Hikmət Hacıyev bildirib.

Azərbaycanın işğal edilmiş ərazilərində Ermənistan silahlı qüvvələrinini mövcudluğu və işğalın davam etməsi birbaşa münaqişə iştirakçısı kimi Ermənistanın beynəlxalq hüquqi məsuliyyətini müəyyən edir.

"Əldə edilmiş razılaşmaların kağız üzərində qalması faktı Ermənistan rəhbərliyini narahat edirsə, onlar BMT Təhlükəsizlik Şurasının müvafiq qərarlarını yerinə yetirməlidir. Bu qərarlar Azərbaycanın işğal edilmiş ərazilərinin dərhal və qeyd-şərtsiz azad edilməsini tələb edir", deyə Hacıyev bildirib.

"Ermənistan başa düşməlidir ki, Azərbaycan 25 ildir ərazilərimizi işğal edən ölkə ilə danışıqlar apararaq, artıq böyük güzəşt edib", deyə o qeyd edib.

Qeyd edək ki, Yerevanın nizamlanma ilə bağlı danışıqlar aparmaqdan imtina etməsi dolayı yolla Qarabağ ermənilərini Bakı ilə güzəştə vadar etmək istəyinin göstəricisi ola bilər. Eyni zamanda, güzəştdən imtina bütün gələcək hadisələrə görə məsuliyyətin Yerevanın deyil, məhz Qarabağ ermənilərinin üzərinə düşəcəyi demək olacaq. -02D-