Prezident İlham Əliyev Avropa Şurası Parlament Assambleyası üzvlərinin Azərbaycana gəlişinə qoyulan qadağanın ləğvi barədə

Avropa Şurası Parlament Assambleyası üzvlərinin Azərbaycana səfərinə qoyulan qadağa ölkənin nümayəndə heyətinin bu təşkilata qayıtmasından sonra ləğv ediləcək. Bu barəsə prezident İlham Əliyev Beynəlxalq Çernobbio Forumunda moderatorun suallarını cavablandırarkən bildirib.

“Keçən il biz öz suverenliyimizi tamamilə bərpa etdik. Beləliklə, ötən ilin sentyabrında Azərbaycan ərazisində separatizmin kökü tamamilə kəsildi. Biz Ukraynanın etməyə çalışdığından fərqli heç nə etməmişik. Qərbin böyük dəstəyinə baxmayaraq, Ukrayna öz suverenliyini bərpa etmək üçün uğursuz səylər göstərir. Biz heç bir dəstək olmadan öz suverenliyimizi bərpa etdik. Məhz bundan bir neçə ay sonra AŞPA bizim nümayəndə heyətini səsvermə hüququndan məhrum etmək qərarına gəldi. Yəni, biz öz suverenliyimizi bərpa etdiyimiz üçün bizə qarşı sanksiyalar tətbiq edilib”, - Əliyev deyib.

Prezident qeyd edib ki, Azərbaycan nümayəndə heyətinin səlahiyyətlərinin uzadılmasının əleyhinə səs verən AŞPA üzvlərinin “persona non-qrata” elan edilməsi qərarı adekvat olub.

“Qərarımız onlara cavab idi. Əgər qərarlarını dəyişib bizim haqqımızı bərpa etsələr, o zaman bu embarqo deyilən şey də aradan qaldırılacaq.  …Nümayəndə heyətimiz qayıtmalıdır, bundan sonra qadağa da götürüləcək”, - Əliyev deyib.

Xatırladaq ki, Avropa Şurası Parlament Assambleyası bu il yanvarın 24-də qış sesiyasında Avropa Şurası qarşısında "əsas öhdəliklərin yerinə yetirilməməsi", həmçinin  Assambleya müşahidəçilərinin 7 fevral növbədənkənar prezident seçkilərinə dəvət edilməməsi səbəbindən Azərbaycan nümayəndə heyətinin səlahiyyətlərini 1 il müddətinə təsdiq etməyib. Bu qərara 76 deputat səs verib, 10 nəfər "əleyhinə" olub, 4 nəfər "bitərəf" qalıb.

Avropa Şurası Parlament Assambleyası bu qərarı Azərbaycan öz ərazi bütövlüyünü bərpa etdiyinə görə yox, insan hüquqlarının və demokratik normaların kütləvi şəkildə pozulmasına görə qəbul edib.