Prezident İlham Əliyev: “Azərbaycan 100 ildən çox müddət üçün karbohidrogen ehtiyatlarının etibarlı təchizatçısı ola bilər”

Bakı/28.02.20/Turan: Azərbaycanın təsdiqlənmiş və proqnozlaşdırılan qaz ehtiyatları 5,6 trln. kubmetr həcmində qiymətləndirilir. Bunu prezident İlham Əliyev fevralın 28-də Bakıda keçirilən Cənub Qaz Dəhlizi (CQD) Məşvərət Şurası çərçivəsində nazirlərin VI toplantısında çıxışı zamanı deyib.

“Bizim təsdiqlənmiş qaz ehtiyatlarımız 2,6 trln. kubmetrdir. Proqnozlaşdırılan ehtiyatlar 3 trln. kubmetr civarındadır”, - İ.Əliyev bildirib. Ona görə də Azərbaycan 100 ildən çox müddət üçün karbohidrogen ehtiyatlarının etibarlı təchizatçısı olacaq.

Onun sözlərinə görə,  Azərbaycan yeni neft- qaz yataqlarının işlənməsi üçün xarici tərəfdaşlarla fəal çalışmağa davam edir. Xüsusilə, BP şirkətilə “D 2030” layihəsi, həmçinin  “Şəfəq- Asiman” qaz yatağı üzərində birgə işlər aparılır və ilk quyu çox tezliklə qazılmalıdır.

Bundan əlavə, BP ilə Abşeron arxipelaqının dayazsulu hissəsinin işlənməsi layihəsi üzərində iş aparılır. İ.Əliyev qeyd edib ki, bu layihə böyük neft potensialına malikdir.

Bununla yanaşı 2021-ci ildən “Total”  ilə 300 mlrd. kubmetr qaz potensialı olan “Abşeron” yatağından qaz hasilatına başlanılacaq.

Həmçinin SOCAR fəal şəkildə “Ümid-Babək” yatağının işlənilməsi ilə məşğuldur. Hazırda “Ümid” yatağının gündəlik hasilatı 3 mln. kubmetr qazdır. Bu yatağın potensialı 200 mlrd. kubmetrdən çoxdur.  “Equinor” ilə birlikdə biz “Qarabağ” yatağı üzərində iş gedir.

Bununla yanaşı “Azəri-Çıraq-Günəşli”də böyük həcmdə dərin qaz yataqları var və SOCAR ilə BP arasında bu istiqamətdə danışıqlar çox uğurla gedir.–06D-