Prezident İlham Əliyev: “Bakının razılığı olmadan Qarabağa heç kim getməyəcək; sülhməramlılar öz funksiyalarını yerinə yetirməlidirlər; Ermənistanın XİN rəhbəri Qarabağda görünməsin”

Bakı/07.01.21/Turan: Azərbaycan məsuliyyət və ədalət göstərərək Ermənistan ərazisinə daxil olmadı, baxmayaraq ki, oradan raket atəşi açılırdı və onlarla Azərbaycan vətəndaşı həlak oldu. Bu barədə dövlət başçısı İlham Əliyev 2020-ci ilin yekunlarına dair müşavirədə bildirib.

“Döyüş meydanında düşmənə dərs verdik. Bu gün Ermənistanı bürümüş böhran onların işğalçılıq siyasətinin nəticəsidir”, - o deyib.

İ.Əliyev Azərbaycanın işğal olunmuş ərazilərində qanunsuz işlər aparan xarici şirkətləri də ittiham edib, deyib ki,  "onlar məsuliyyətə cəlb ediləcəklər". Onlar bunu bilsinlər və gözləsinlər bu günü”, - İ.Əliyev hədələyib.

Sonra o, əcnəbiləri Qarabağa buraxan Rusiya sülhməramlılarının fəaliyyətini tənqid edib. “Biz sülhməramlı qüvvələrin qarşısında məsələ qoymuşduq ki, bizim icazəmiz olmadan heç bir xarici vətəndaş Dağlıq Qarabağa gedə bilməz. Lakin Fransa parlamentinin nümayəndə heyəti oraya gedib. Bundan sonra Fransa səfiri XİN-ə çağırılıb və ona nota təqdim edilib", - prezident bildirib.

O, rəsmi Yerevanın hərəkətlərini, xüsusilə Ermənistan XİN rəhbərinin Qarabağa səfərini pisləyib. “Sənin orada nə işin var? Müharibə onların yadından çıxmasın. Bu səfərlərə son qoyulmalıdır. Biz xəbərdarlıq edirik, əgər belə təxribat xarakterli addımlar atılacaqsa, Ermənistan daha da peşman olacaq. Rusiya nümayəndə heyətinin Ermənistana və Azərbaycana səfəri münasibətlərin normallaşdırılması məsələsinə həsr olunub. Əgər münasibətlər normallaşacaqsa, o zaman belə təxribat xarakterli “səfərlər”ə nə ehtiyac var? Nəyi göstərmək istəyirlər? Yenəmi bizi qıcıqlandırmaq istəyirlər? Unutmasınlar ki, onlara çox baha başa gəldi bu tipli addımlar”, - dövlət başçısı deyib.

“Ona görə bütün səfərlərə son qoyulmalıdır. Heç bir xarici vətəndaş bizim icazəmiz olmadan o əraziyə gedə bilməz. Heç bir beynəlxalq təşkilat, Qırmızı Xaç istisna olmaqla,  oraya gedə bilməz. Bu, bizim ərazimizdir. Bütün dünya bu ərazini Azərbaycanın ayrılmaz hissəsi kimi tanıyır. Ermənistanın xarici işlər naziri, sən kimsən ki, oraya gedirsən? Xəbərdarlıq edirik. Əgər buna oxşar addım təkrarlanarsa, bizim cavabımız çox sərt olacaq”, - İ.Əliyev bildirib.

Daha sonra o, öz səlahiyyətlərini aşan Rusiya sülhməramlılarına toxunub. "10 noyabr bəyanatda onların funksiyaları göstərilib və orada humanitar fəaliyyət göstərilməyib. Amma biz buna göz yumurduq. Biz başa düşürdük ki, indi qışdır, bərpa üçün addımlar və tədbirlər lazımdır. Biz humanitar mülahizələrlə buna razılaşdıq və ermənlər bunu qiymətləndirməlidirlər. Biz həmçinin icazə verdik ki, Qarabağa yüklər Laçın üzərindən deyil, dəmir yolu ilə Bərdədən aparılsın”.

Sonda o, ermənilərin evləri və yollarının Azərbaycanın nəzarətində olduğu Qubadlı rayonunda sərhəddin bərpası məsələsinə də toxunub. Ermənilər Azərbaycan ərazilərini işğal edib məskunlaşdırarkən düşünmürdülər ki, nə vaxtsa getmək lazım gələcək.

"Biz onları bir gündə oradan çıxara bilərdik, amma biz vaxt verdik. Lakin onlar Kəlbəcəri zəbt edəndə bizim adamlar oradan dərhal, ayaqyalın, əmlaksız çıxmışdılar. Onlara heç kim vaxt verməmişdi. Bunu xatırlasınlar və bizim münasibətimizi qiymətləndirsinlər", - İ.Əliyev deyib.

Hərbi əməliyyatlar başa çatdıqdan sonra silahlı ermənilər təxribatçıdırlar. Onları məhv etməmək, əsir götürmək əmri verilib. "Müharibə başa çatıb, daha qan tökmək lazım deyil? Onları oraya kim göndərir? Noyabrın 26-da Şirak vilayətindən oraya hərbçilər göndəriblər, niyə? Əgər Ermənistan hakimiyyəti qanunsuz silahlı birləşmələrə nəzarət etmirsə, bu, onların problemidir", - İ.Əliyev deyib. -02D-