Prezident İlham Əliyev britaniyalı naziri qəbul edib

Bakı/14.12.17/Turan: Bu gün prezident İlham Əliyev Bakıda səfərdə olan Böyük Britaniyanın ticarət və ixracın təşviqi üzrə naziri, hökumətlərarası iqtisadi komissiyanın həmsədri baronessa Rona Feyrhedi qəbul edib.

Rəsmi məlumatda deyilir ki, tərəflər Azərbaycanla Böyük Britaniya arasında siyasi, iqtisadi, energetika və digər sahələrdə uğurlu inkişafın olduğunu qeyd ediblər. Əməkdaşlığın genişləndirilməsi üçün potensialın olduğu vurğulanıb.

İ.Əliyev qeyd edib ki, Böyük Britaniya Azərbaycanın ən böyük xarici investorudur, BP şirkəti isə Azərbaycanın qlobal enerji layihələrində əsas tərəfdaşıdır.

Azərbaycanda iqtisadiyyatın şaxələndirilməsi istiqamətində böyük işlərin görüldüyünü deyən dövlət başçısı qeyd edib ki, Böyük Britaniya şirkətləri qeyri-neft sahəsində də həm investor, həm də podratçı kimi iştirak edə bilər.

Öz növbəsində R.Feyrhed Britaniya hökumətinin əməkdaşlığı genişləndirməyə hazır olduğunu bildirib.

Görüş zamanı energetika sahəsində əməkdaşlığın perspektivləri ətrafında məsələlərə toxunulub, "Şahdəniz-2" layihəsinin uğurlu icrasının və "Azəri-Çıraq-Günəşli" müqaviləsinin uzadılmasının əhəmiyyəti vurğulanıb.

Həmçinin infrastruktur sahəsində Britaniya şirkətlərinin iştirakı, ticarət, qarşılıqlı sərmayə qoyuluşu, alternativ enerji, kənd təsərrüfatı, turizm, təhsil sahələrində əlaqələrin genişləndirilməsi ilə bağlı məsələlər ətrafında fikir mübadiləsi aparılıb.-06D--