Prezident İlham Əliyev erməniləri hədələyib

Qarabağ münaqişəsinin nizamlanmamasına Ermənistanın qeyri-konstruktiv mövqeyi səbəb olur.  Bu barədə prezident İlham Əliyev mayın 27-də Respublika Günü münasibətilə keçirilən rəsmi qəbul zamanı bildirib.

“Azərbaycanın ərazi bütövlüyü mübahisə mövzusu deyil. Azərbaycanın ərazi bütövlüyü heç vaxt danışıqlar predmeti olmayıb və olmayacaq. Münaqişə BMT Təhlükəsizlik Şurasının dörd qətnaməsi əsasında öz həllini tapmalıdır. Başqa həll variantı yoxdur”, - İ.Əliyev bildirib.

“Biz imkan vermərik ki, öz ərazimizdə ikinci qondarma erməni dövlətini yaratsınlar. Birinci erməni dövləti bizim ərazimizdə, qədim Azərbaycan torpağında, İrəvan, Göyçə, Zəngəzurda qurulub. İkinci erməni dövləti olmayacaq. Heç vaxt qondarma Dağlıq Qarabağa heç bir hüquqi status verilməyəcək”, - o vurğulayıb.

Prezident qeyd edib ki,  Ermənistan bundan sonra da mümkün qədər təcrid vəziyyətində saxlanılacaq. “Nə qədər ki, Ermənistanın rəhbərliyində kriminal, korrupsiyalaşmış diktatura rejimi var, o qədər də tez Ermənistanın vəziyyəti daha da ağır olacaq. Ona görə, əgər erməni xalqı qonşularla mehribanlıq şəraitində yaşamaq istəyirsə, ilk növbədə, kriminal, qaniçən, qanunsuz rejimdən imtina etməlidir, onları tarixin arxivinə göndərməlidir. Ermənistan işğal edilmiş torpaqlardan çıxmalıdır ki, bir qədər nəfəs ala bilsin. Əks təqdirdə bu ölkənin taleyi çox qaranlıq olacaq”, - dövlət başçısı bildirib.

Azərbaycan bundan sonra da öz hərbi potensialını möhkəmləndirəcək. “Biz gələcək illərdə hərbi potensialımızın gücləndirilməsi üçün nə qədər lazımsa, o qədər vəsait ayıracağıq, ən müasir texnika alınır və alınacaq. Azərbaycan ordusu dünya miqyasında texniki təchizat baxımından güclü ordular sırasındadır. Ordu quruculuğunda, orduda gedən islahatlar bizim döyüş qabiliyyətimizi artırır, orduda nizam-intizam möhkəmlənir, struktur islahatları aparılır, təmas xəttində əlavə işlər görülür və görüləcək”, - o qeyd edib.

Etimad tədbirlərinin möhkəmləndirilməsi barədə həmsədr ölkələrin çağırışlarına reaksiya verən İ.Əliyev deyib ki, ən gözəl etimad tədbiri erməni işğalçı qüvvələrinin Azərbaycan torpaqlarından çıxarılmasıdır.  “Başqa etimad tədbiri ola bilməz. Nə qədər ki, torpaqlarımız işğal altındadır, müharibə bitmiş hesab oluna bilməz”.

“Əgər Ermənistan istəmirsə ki, ikinci mərhələ başlasın, onda düzgün nəticə çıxarsın, işğal edilmiş torpaqlardan öz xoşu ilə çıxsın. Bəlkə o vaxt gələcəkdə müstəqil erməni dövləti xəritədə qala bilər”, - dövlət başçısı vurğulayıb.  –06D-