![Prezident seçkiləri 2013-cü ildə İctimai Palatanın əsas prioritetidir](https://turan.az/resized/750/500/resize/media/2013/main/010500023596.jpg)
Prezident seçkiləri 2013-cü ildə İctimai Palatanın əsas prioritetidir
16 oktyabr prezident seçkiləri 2013-cü ildə İctimai Palatanın əsas prioriteti olacaq. Şənbə günü İctimai Palata Məclisinin sessiyasında qurumun 2013-cü il üçün fəaliyyətinin əsas istiqamətləri təqdir edilib.
Beləliklə, seçkilərdə iştirak edib-etməmək, demokratik seçkilər üçün şəraitin olmaması ilə əlaqədar onu boykot etməklə bağlı İctimai Palata daxilində çoxaylıq müzakirələrə son qoyulub.
Müsavat Partiyasının lideri İsa Qəmbər bildirib ki, seçkiqabağı kampaniyada iştirak etməklə demokratik şəraitə nail olmaq olar.
Eyni zamanda İctimai Palata müxalifətdən prezidentliyə vahid namizədin irəli sürülməsi ilə bağlı konsensusa gələ bilməyib.
Lakin müxalifət liderləri öz tərəfdarlarını bütün səyləri hakim rejimə qarşı mübarizəyə yönəltməyə çağırıblar.
“Müxalifət daxilindəki çəkişmələrə “yox” deyərək dinastiya hakimiyyətinə son qoymaq lazımdır, yol vermək olmaz ki, İlham Əliyev daha 5 il ölkəni idarə etsin, bu məqsədə çatmaq üçün kütləvi etiraz aksiyaları, xalq hərəkatı təşkil etmək lazımdır”, - AXCP lideri Əli Kərimli bildirib.
Müsavat Partiyasının lideri İsa Qəmbəri bu təşkilatın Məclisi tərəfindən prezidentliyə namizədliyinin irəli sürülməsi münasibətilə təbrik edən Ə.Kərimli demokratik qüvvələrin daha geniş koalisiyasının formalaşmasına tərəfdar olduğunu bildirib.
Öz növbəsində İ.Qəmbər deyib ki, müxalifətdən bir neçə namizədin irəli sürülməsi demokratik qüvvələrin qələbə şansını azaltmır.
“Əgər seçkiqabağı prosesin sonunda görsək ki, kimsə daha güclüdür və irəli gedir, onun şansı daha çoxdur, onu dəstəkləyərik”, -İ.Qəmbər vurğulayıb.
“Bəzən biz hakimiyyəti unudaraq bir-birimizə tənqidi yanaşırıq. Hədəfimiz hakim rejimdir, İlham Əliyevdir, bunu unutmamalıyıq. Biz bir-birimizə güvənməli və arxalanmalıyıq”, - İ.Qəmbər bildirib.
İclas iştirakçılarının bir çoxu qeyd edib ki, müxalifətin vahid namizədi barədə məsələ seçki kampaniyasının sonunda həll oluna bilər.
“Dünən Müsavat Partiyasının lideri İsa Qəmbərin namizədliyi irəli sürülüb. Mən onu dəstəkləyirəm. Əgər sabah AXCP lideri Əli Kərimlinin namizədliyi irəli sürülsə, onu da dəstəkləyəcəyəm. Bütün hallarda müxalifətin vahid namizədi məsələsi seçki kampaniyasının sonunda müəyyənləşəcək. Bu namizəd meydanlarda xalq tərəfindən müəyyən ediləcək. Odur ki, sosial şəbəkələrdə bir-birinə qarşı mübarizə aparmaq lazım deyil”, - keçmiş vicdan məhbusu, hüquq müdafiəçisi Vidadi İsgəndərli vurğulayıb.
Sonda İctimai Palatanın sessiyası seçkilərdə “bir və ya bir neçə namizədlə fəal iştirak etmək”, seçkiqabağı fəaliyyət planını hazırlamaq, seçkilərin monitorinqini təşkil etmək, seçkilərin demokratikliyinə nail olmaq üçün bütün müxalifət qüvvələrinin konsolidasiyasına nail olmaq barədə qərar qəbul edib.
Sessiyada politoloq Zəfər Quliyev İctimai Palatanın Koordinasiya Şurasının yeni sədri seçilib.—06D--
Siyasət
-
İyulun 26-da “III Respublika Platforması” bəyanat yayaraq, bu qurumun həbsdə olan rəhbəri Akif Qurbanovun azyaşlı uşaqlarının elektron cihazlarının qanunsuz ələ keçirilməsinə diqqət çəkiblər.
-
İyulun 19-dan iyulun 26-dək Xankəndidə 24 avtomat, 1 pulemyot, 9 tüfəng, 28 qumbara, 441 mərmi, 3118 müxtəlif çaplı patron və digər döyüş sursatları aşkar edilib, bu barədə Daxili İşlər Nazirliyi məlumat yayıb.
-
Prezident İlham Əliyev fərmanla müdafiə sahəsində hərbi kəşfiyyat sahəsində əməkdaşlıq haqqında Azərbaycan-Qazaxıstan hökumətlərarası sazişi təsdiq edib.
-
Bakı Ağır Cinayətlər Məhkəməsində müxalif siyasətçi Tofiq Yaqublunun məhkəməsində digər təqsirləndirilən Elnur Vaqıfoğlunun ifadəsi dinlənilib.
Rəy yaz