![Prezident: Uğurlu əməkdaşlıq həyata keçirilir](https://turan.az/resized/750/500/resize/media/2018/main/102400014280.jpg)
Prezident: Uğurlu əməkdaşlıq həyata keçirilir
Bakı/24.10.18/Turan: "Azərbaycan ilə ABŞ arasında müxtəlif sahələrdə uğurlu əməkdaşlıq həyata keçirilir". Prezident İlham Əliyev bunu oktyabrın 24-də ABŞ Prezidentinin milli təhlükəsizlik məsələləri üzrə müşaviri Con Boltonu qəbul edərkən deyib.
Prezident ATƏT-in Minsk qrupunun həmsədri kimi Ermənistan-Azərbaycan Dağlıq Qarabağ münaqişəsinin həlli yollarının axtarılmasında ABŞ-ın mühüm rol oynadığını xüsusi vurğulayıb.
Dövlət başçısı daha sonra ABŞ rəsmisini Qarabağ probleminin hazırki durumu ilə bağlı məlumatlandırıb. Qarabağla bağlı BMT-nin qəbul etdiyi qətnamələrə əsasən, Ermənistan silahlı qüvvələrinin Azərbaycan işğal etdiyi ərazilərdən çıxarılmasını vacib sayıb: "Ölkəmizin ərazi bütövlüyü bərpa olunmalıdır və Azərbaycan ümid edir ki, Minsk qrupunun həmsədr ölkələrinin fəaliyyəti praktiki nəticələr verəcək", deyə İ.Əliyev bildirib.
Dövlət başçısı Azərbaycanın Əfqanıstanda sülhməramlı əməliyyatlarda iştirakına toxunaraq, bu əməliyyatlarda iştirak edən hərbçilərin sayının 120 nəfərə qədər artırdığını deyib və bunu "Qətiyyətli Dəstək" missiyasına Azərbaycanın töhfəsinin yaxşı göstəricisi kimi dəyərləndirib.
İ.Əliyev energetika sahəsində Azərbaycan ilə ABŞ arasında yüksək səviyyədə əməkdaşlıq həyata keçirildiyini və nəhəng qlobal layihələr reallaşdığını xüsusi vurğulayıb: "Bu layihələr sırasında "Cənub Qaz Dəhlizi" layihəsi böyük önəm daşıyır. 40 milyard dollar həcmində və Avropanın ən böyük infrastruktur layihəsi olan bu layihə başa çatmaq üzrədir və bu, Avropanın enerji təhlükəsizliyinin təmin olunması işinə və regional sabitliyə öz töhfəsini verəcəkdir".
Dövlət başçısı Con Boltonun səfərinə Azərbaycan tərəfin böyük önəm verdiyini, bu səfərin iki ölkə arasında əlaqələrin möhkəmlənməsinə xidmət edəcəyinə əminlik bildirib.
C.Bolton öz növbəsində Azərbaycanla münasibətlərin ABŞ üçün yüksək prioritet təşkil etdiyini vurğulayıb.
O, siyasi, iqtisadi, təhlükəsizlik və digər sahələrdə də əlaqələrin önəminin artdığını bildirib.
Azərbaycana səfərinin mahiyyətinə toxunan C.Bolton səfəri çərçivəsində əlaqələrin hazırki durumu, beynəlxalq sülhə və təhlükəsizliyə təhdidlərlə bağlı məsələləri müzakirə etmək niyyətində olduqlarını deyib.
İqtisadi əməkdaşlığa toxunan Con Bolton qeyd edib ki, Azərbaycanın beynəlxalq enerji məsələlərində aparıcı rolu nəzərə alınaraq, ABŞ hökuməti Azərbaycanla enerji sahəsində, eləcə də başqa istiqamətlərdə, o cümlədən beynəlxalq terrorizm, insan alverinə qarşı mübarizə və digər sahələrdə əməkdaşlığı daha da genişləndirmək əzmindədir.
Con Bolton Ermənistan-Azərbaycan Dağlıq Qarabağ münaqişəsi ilə bağlı deyib ki, ABŞ məsələnin Azərbaycan üçün piroritet məsələ olduğunu yaxşı anlayır və onun səfərinin əsas məqsədlərindən biri də münaqişənin həlli ilə bağlı vəziyyəti Azərbaycanın necə dəyərləndirməsi barədə daha ətraflı məlumat toplamaqda.
Söhbət zamanı Azərbaycan ilə ABŞ arasında strateji əməkdaşlığın müxtəlif istiqamətləri ilə bağlı məsələlər müzakirə edilib. -05D-
-
- Siyasət
- 24 Oktyabr 2018 16:41
Siyasət
-
Bakı Ağır Cinayətlər Məhkəməsində müxalif siyasətçi Tofiq Yaqublunun məhkəməsində digər təqsirləndirilən Elnur Vaqıfoğlunun ifadəsi dinlənilib.
-
Avropanın “EU Reporter” nəşri cümə günü onun siyasi redaktoru Nik Pauelin Şuşada keçirilən Qlobal Media Forumunda iştirak edərkən təbii səbəblərdən vəfat etməsi barədə məlumat yayıb.
-
43-cü gündür aclıq edən iqtisadçı Fazil Qasımovun vəziyyəti kəskin pisləşib. İyulun 26-na keçən gecə o, 1 sayl Bakı İstintaq Təcridxanasından Penitensiar Xidmətin müalicə müəssisəsinə köçürülüb. Bu barədə Turan-a onun qardaşı Nazim Qasımov bildirib.
-
İyulun 26-da Bakı Ağır Cinayətlər Məhkəməsində ictimai fəal Bəxtiyar Hacıyevin işi üzrə proses davam etdirilib. Üç şahidin ifadəsini dinləyiblər.
Rəy yaz