Prokurorluq KİV-də Dövlət Dəstəyi Fondunda mənimsəmə faktlarını araşdırır

Bakı/10.06.20/Turan: Hesablama Palatasının Kollegiyası Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fonduna büdcədən ayrılan vəsaitlərin icrasına dair maliyyə və uyğunluq auditinin nəticələri barədə Auditor hesabatını müzakirə edib.

Palatadan verilən məlumuta görə, auditlə vəzifəli şəxslər tərəfindən dövlət satınalmaları haqqında qanunvericiliyin tələblərinə əməl edilməməsi, vəsaitlərin təyinatı üzrə istifadə edilməməsi, tikinti norma və qaydalarının pozulması, kütləvi informasiya vasitələrinə yardımların qanunvericiliyin tələblərinin pozulması ilə verilməsi və digər hallar üzrə aşkar edilmiş olunmuş nöqsanlarla bağlı materialların "Hesablama Palatası haqqında" Azərbaycan Respublikası Qanununun 26.2-ci maddəsinə əsasən, Azərbaycan Respublikasının Baş Prokurorluğuna göndərilməsi qərara alınıb.

Xatırladaq ki, KİV-in İnkişafına Dövlət Dəstəyi Fondunun rəhbəri Vüqar Səfərli bu il aprelin 4-də ölkə prezidentinin fərmanı ilə vəzifədən azad edilib.

Uzun illər boyunca Fondun fəaliyyəti tənqidə səbəb olub və qeyri-şəffaf olub. Bu qurum dövlət başçısının ideologiya üzrə keçmiş köməkçisi Əli Həsənovun nəzarəti altında idi.

Bir çox jurnalistlər və KİV-lər Həsənovu və Səfərlini vəzifədən sui-istifadədə və 2009-cu ildə yaradılmış Fondun vəsaitlərini mənimsəməkdə ittiham edirdilər. -16D-