Prokurorluq qalmaqallı videokadrları araşdırır - Azərbaycan XİN ittihamlara cavab verir

Bakı/04.10.22/Turan: Azərbaycan Hərbi Prokurorluğu Azərbaycan əsgərlərinin hərbi cinayət törətdiyi iddia olunan videokadrları araşdırmağa davam edir. Araşdırma beynəlxalq qurumların çağırışlarına cavab olaraq deyil, məhz Azərbaycanın hər zaman beynəlxalq öhdəliklərinə ciddi yanaşması çərçivəsində başlayıb. Bu barədə XİN-in mətbuat katibi Leyla Abdullayevanın KİV-lərin bir neçə gün əvvəl sosial şəbəkələrdə yayılmış videokadrlarla bağlı sorğusuna cavabında deyilir. 

O qeyd edib ki, həmin beynəlxalq qurumlar erməni hərbiçilərin Birinci və İkinci Qarabağ müharibələri zamanı törətdiyi çoxsaylı hərbi cinayətlərə heç bir reaksiya verməyiblər. Onlar böyük əksəriyyəti mülki şəxs olmaqla, 250-dək şəxsin mina qurbanı olmasına da reaksiya vermirlər.

"Azərbaycana çağırış edənlər qərəzsizlik və ədalətli mövqe nümayiş etdirmək istəyirlərsə, məsələyə hərtərəfli yanaşmalı, Ermənistan tərəfindən bugünədək törədilən çoxsaylı cinayətlərin araşdırılması və məsuliyyət daşıyan şəxslərin qanun qarşısında cavab verməsini tələb etməlidirlər. Əks təqdirdə bu, erməni təbliğatı nəticəsində verilmiş birtərəfli açıqlamadan başqa bir şey deyildir", deyə Abdullayeva qeyd edib.

Qeyd edək ki, dünən Dövlət Departamentinin mətbuat katibi Ned Prays, habelə Böyük Britaniyanın və Fransanın Bakıdakı səfirlikləri "erməni əsirlərin güllələnməsi haqqında" videokadrları araşdırmağa və təqsirli olanları cəzalandırmağa çağırıb.

"Azərbaycan Baş Prokurorluğunun videogörüntülərin hərtərəfli araşdırılmasına sadiqliyi haqqında bəyanatını alqışlayırıq. Araşdırma nəticələrinin açıqlanmasını gözləyirik. Amansız rəftar və qətllər haqqında bütün iddiaların tam araşdırılacağına ümid edirik", deyə Böyük Britaniya səfirliyinin bəyanatında bildirilir. 

"Azərbaycan ordusu tərəfindən erməni əsirlərin mühakiməsiz edamını əks etdirən videogörüntülər şok yaradır. Fransa Azərbaycanın elan etdiyi bu əməllərlə bağlı araşdırılmanın başlanmasını nəzərə alır və onları törədənlərin məsuliyyətə cəlb olunmasına çağırır.

Fransa hələ də həbsdə olan bütün erməni məhbusları azad etməyə çağırır", deyə Fransa səfirliyinin bəyanatında qeyd edilir.

"ABŞ erməni əsgərlərin güllələnməsi kadrlarından dərin narahatlıq hissi keçirir", Dövlət Departamentinin mətbuat katibi Ned Praysın bəyanatında belə deyilir.

"Tam və qərəzsiz araşdırma aparmağa çağırırıq. Bu vəhşiliklərdə təqsirli olanlar məsuliyyətə cəlb olunmalıdır", deyə o bildirib. 02D