Qubad İbadoğlunun ailəsi narahatdır ki, onu Navalnının aqibəti gözləyə bilər

Müxalifətçi siyasətçi və iqtisadçı alim, həbsdə olan Qubad İbadoğlunun yaxınları ehtiyat edirlər ki, o da Rusiya müxalifətinin lideri, koloniyada ölən Aleksey Navalnının aqibətilə üzləşə bilər.

"Hələ ötən ilin sentyabrında Azərbaycandakı xarici səfirliklərin rəhbərlərinə müraciət etdim ki, həbsdə olan qardaşıma effektiv tibbi yardım göstərilmir. Biz, onun ailəsi Qubadın fiziki olaraq məhv edilə biləcəyindən narahat olduğumuzu bildirdik", - siyasətçinin qardaşı Qalib Bayramov Turan-a bildirib.

O qeyd edib ki, İbadoğlunun sağlamlığına təhdidlər barədə yerli və beynəlxalq qurumlara mütəmadi məlumat verir.

Ciddi problemlərə baxmayaraq, İbadoğlunu xəstəxanaya yerləşdirməkdən imtina edirlər. "Navalnının ölümündən sonra biz ciddi şəkildə narahatıq ki, qardaşım da eyni aqibəti yaşaya bilər", - Bayramov deyib.

* Ötən il iyulun 24-də Bakının Nərimanov Rayon Məhkəməsi Azərbaycan Demokratiya və Rifah Partiyasının sədri Qubad İbadoğlunu 3 ay 26 gün müddətinə həbs edib. O, saxta pulların hazırlanmasında (Azərbaycan Cinayət Məcəlləsinin 204.3.1-ci maddəsi), həmçinin 167-3.1-ci maddə (ekstremizmyönlü materialların saxlanması və yayılması) ilə ittiham olunub.

Bir sıra ölkə və beynəlxalq təşkilatlar, o cümlədən ABŞ Dövlət Departamenti, ABŞ senatorları və konqresmenləri Qubad İbadoğlunu azad etməyə çağırıblar.