REAL-ın qurultayı dekabrın 17-də olacaq

Bakı/13.12.17/Turan: Dekabrın 17-də saat 10:00-dan 18:00-dək Respublikaçı Alternativ Partiyasının (REAL) təsis qurultayı olacaq. Qurultay Müsavat Partiyasının qərargahında keçiriləcək. Bu barədə Turan-a REAL-ın icra katibi Natiq Cəfərli bildirib. Onun sözlərinə görə, qurultayda 300-dək nümayəndənin iştirakı gözlənilir.

"1920 nəfər Azərbaycan vətəndaşı REAL Partiyasının təsisçilərinin təşəbbüs qrupuna üzv olub. Ölkəmizin bütün regionlarında (Naxçıvan MR istisna olmaqla) el məclisləri formalaşıb", - o qeyd edib.

N.Cəfərlinin sözlərinə görə, təsis qurultayı partiyanın nizamnamə və proqramını qəbul edəcək, seçkili orqanlarını (Məclis və Nəzarət Təftiş Komissiyası) seçəcək.

Partiyanın sədrini yeni formalaşacaq məclis seçəcək.

Xatırladaq ki, REAL dəfələrlə Bakı meriyasına və Bakı şəhərindəki biznes mərkəzlərə, hotellərə qurultay keçirmək üçün yer ayırılması xahişi ilə müraciətlər edib. Lakin onların müraciətinə müsbət cavab verən olmayıb.

REAL Hərəkatı 2009-cu ildə yaradılıb. Hərəkat Konstitusiyaya bir şəxsin iki dəfədən çox prezident seçilməsinə imkan verən düzəlişin edilməsinin əleyhinə olub.

Hərəkatın lideri İlqar Məmmədov 2013-cü ildə İsmayıllı rayonunda baş vermiş iğtişaşların təşkili ilə bağlı uydurma ittihamla həbs olunaraq 7 il azadlıqdan məhrum edilib.

Avropa İnsan Hüquqları Məhkəməsi onun həbsini qanunazidd və siyasi motivli hesab edərək dərhal azadlığa buraxılmasını tələb edib. Strasburq məhkəməsi bu qərarı 2014-cü ilin mayında qəbul edib. Ancaq indiyədək yerinə yetirilməyib.

Dekabrın 5-də AŞ Nazirlər Komitəsi İ.Məmmədovun işilə bağlı AİHM-in qərarını yerinə yetirmədiyinə görə Azərbaycana qarşı prosedura başlayıb. Əgər İ.Məmmədovu azad etməsələr Bakıya qarşı sanksiya tətbiq edilə bilər.-03B06-