ResPlatforma müxalif kimliyini və respublika dəyərlərinə sadiqliyini təsdiq edir

III Respublika Platforması (ResPlatforma) quruluş ildönümü ilə bağlı bəyanat yayaraq, respublika dəyərlərinə sadiqliyini təsdiq edib.

Bəyanatda qeyd edilir ki, ResPlatforma Post-Qarabağ Gündəliyi ilə Azərbaycan ictimaiyyətinin qarşısına çıxaraq, Azərbaycan siyasi həyatının düçar olduğu ifrat etatizmdən qurtulmağa və müasir desentralizasiyaçı demokratik prinsiplər əsasında ölkənin real və taleyüklü problemlərinin aradan qaldırılmasına dair ideyalar irəli sürür. Post-Qarabağ Gündəliyi təsbit edir ki, artıq Qarabağ problemi həll edilib və Azərbaycan siyasətinin fokus nöqtəsi vahid əldə təmərküzləşmiş yarıtmaz idarəçilik anlayışından xilas olmağa yönəlməlidir. Bu məqsədlə ResPlatforma, ilk növbədə, mütərrəqi vətəndaşlarımızı siyasi iştirakçılığa və əməkdaşlığa dəvət edir.

Yarandığı dövrdən ResPlatforma ölkənin təməl problemlərinə dair konseptual sənədlərlə çıxış edib, ictimai müzakirələrdə fəal iştirak edib və hazırkı repressiya şəraitində hərəkatın institusional bazasını qoruyub saxlamağa çalışıb.

Daha sonra, ResPlatforma birinci quruluş ildönümündə öz prinsip və dəyərlərinə bağlılığını bir daha təkrarlayaraq Əliyev hökumətinə qarşı prinsipial müxalif mövqeyindən geri çəkilmədiyini və hərəkatın quruluş və konseptual sənədlərinə əsasən fəaliyyətini davam etdirəcəyini bəyan edir.

* ResPlatforma - 7 dekabr 2023-cü il tarixində demokratiya və qanunun aliliyinin mərkəzsizləşdirilməsi ideyası ətrafında birləşən siyasətçilər tərəfindən təsis edilmiş və vətəndaş iştirakını təşviq etmək məqsədi daşıyan siyasi hərəkatdır.