Rövşən Əkbərov bütün ölkəyə 20 il məlum olan cinayətdə ittiham olunur

Bakı/17.03.21/Turan: Martın 17-də Azərbaycan Baş Prokurorluğu Bakı Ordu Korpusunun keçmiş komandiri general-leytenant Rövşən Əkbərovun həbsinin səbəbini elan edib.

2021-ci il martın 15-də Rövşən Əkbərov Cinayət Məcəlləsinin 12.1, 120.2.2 (qəsdən adam öldürmə) və 12.1, 221.3-cü (xuliqanlıq) maddələri ilə təqsirləndirilən şəxs qismində cəlb edilib.

Ona qarşı bu maddələr üzrə ittiham irəli sürülüb və Baş Prokurorluğun təqdimatı əsasında Bakı Hərbi Məhkəməsi onu 4 ay istintaq müddətinə həbs edib.

Xatırladaq ki, söhbət 2001-ci ildə baş vermiş qətldən gedir. 2001-ci il iyunun 1-də Kiyevdə “Sikora” kafesində yemək-içməkdən sonra Rövşən Əkbərov münaqişə zəminində vətəndaş Elçin Əliyevi ürəyinə vurduğu bıçaq zərbəsi ilə öldürüb.

Ukrayna prokurorluğu Cinayət Məcəlləsinin müvafiq maddələri ilə cinayət işi açıb və 2003-cü ildə işi Azərbaycana göndərib.

Bakıda istintaqı Hərbi Prokurorluq və Baş Prokurorluğun Ağır Cinayətlərə dair İşlər üzrə İstintaq İdarəsi aparırdı, amma “cinayəti törədən şəxs müəyyən edilmədiyinə” görə iş bağlanıb.

2020-ci ildə Baş Prokurorluqda bu cinayət işi yenidən tədqiq edildikdən sonra onun icraatı bərpa edilib. Baş Prokurorluğun İstintaq İdarəsi çoxsaylı istintaq hərəkətləri aparıb və kifayət qədər sübut toplayıb, bu cinayət əməlinin Rövşən Əkbərov tərəfindən törədilməsinə əsaslı şübhələr müəyyən edib, deyə Baş Prokurorluğun məlumatında bildirilir.

Prokurorluq buna 19 il sərf edib. Qeyd edək ki, uzun illər boyunca kütləvi informasiya vasitələri bu qətl haqqında yazıb, qətlə yetirilən şəxsin valideynləri isə mətbuat konfransları keçirib. Amma prokurorluq onlara məhəl qoymayıb. -0-