Rusiya-Azərbaycan-İran sammiti Rusiyada keçiriləcək

Moskva/17.08.19/Turan: Təxirə salınmış Rusiya-Azərbaycan-İran sammiti Rusiyada keçiriləcək, amma onun keçiriləcəyi yeni tarix haqqında hələlik məlumat yoxdur. Bu barədə jurnalistlərə prezidentin köməkçisi Yuri Uşakov bildirib.

"Biz təcrübi qaydalara görə onu təxirə saldıq və tərəfdaşlarımızla görüşün keçiriləcəyi yeni tarix barədə razılıq əldə etmək barədə vədləşdik, baxmayaraq ki, görüşün bizim ölkədə keçiriləcəyi aydındır", deyə TASS agentliyi Uşakovdan sitat gətirir.

Avqustun 14-nə Soçidə təyin edilmiş üçtərəfli sammitin təxirə salınması "texniki səbəblərdən" baş verib, deyə bir müddət əvvəl Rusiya prezidentinin mətbuat katibi Peskov bildirmişdi.

Rusiya-Azərbaycan-İran formatında danışıqlar ilk dəfə 2016-cı ilin avqustunda Bakıda keçirilib. Həmin vaxt əsas müzakirə mövzusu birgə iqtisadi layihələr və regional təhlükəsizlik məsələləri olmuşdu. Sammitin yekunlarına görə tərəflər birgə bəyannamə qəbul etmiş, üçtərəfli əməkdaşlığı inkişaf etmək niyyətlərini təsdiq etmişdilər.

Rusiya-İran-Azərbaycan formatında yüksək səviyyədə növbəti görüş 1 noyabr 2017-ci il tarixində Tehranda keçirilib. Üç ölkə lideri geniş məsələlər dairəsini, o cümlədən energetika sahəsində qarşılıqlı fəaliyyət, Suriya nizamlanması və Xəzərdə əməkdaşlıq məsələlərini müzakirə etmişdilər. Həmin vaxt Rusiya prezidenti Vladimir Putin həmkarlarını növbəti üçtərəfli sammit üçün Rusiyaya dəvət etmişdi. -02D-