Rusiyanın böyük qruplaşması Liman şəhərində mühasirəyə düşüb

Bakı/01.10.22/Turan: İndiki müharibə zamanı Ukraynadakı Rusiya qoşunlarını ən böyük məğlubiyyət gözləyir. Ukraynanın şərqində, Luqansk vilayətilə sərhəddə Liman şəhərində 2 mindən 5 minədək  əsgər mühasirəyə düşüb.

Bu gün Ukrayna Silahlı Qüvvələri Liman ərazisində rus qruplaşmasının mühasirəsinin başa çatdığını təsdiqləyib. Bu barədə qoşunların şərq qruplaşmasının spikeri Sergey Çerevatı bildirib.

“Rus qruplaşması Liman ərazisində mühasirəyə alınıb. Yampol, Novoselovka, Şandriqolovo, Drobışevo, Stavki yaşayış məntəqələri azad edilib, orada stabilləşdirmə tədbirləri davam etdirilir", - Çerevatı deyib.

Luqansk vilayət hərbi administrasiyasının rəhbəri Sergey Qaydayın sözlərinə görə, Limanda yerləşən Rusiya hərbçiləri çıxmaq xahişilə öz rəhbərliklərinə müraciət ediblər, lakin imtina cavabı alıblar. Rusiya Federasiyasının 5 mindən çox hərbçisi mühasirədədir.

Hələ bir neçə gün öncə Qərb analitikləri bildirmişdilər ki, görünür, Ukrayna Silahlı Qüvvələri Donetsk vilayəti Liman şəhərində Rusiya qüvvələrini mühasirəyə almaq niyyətindədir. Bu, müdafiəçilərə Luqansk vilayətinin qərb sərhədi boyunca və Severodonetsk-Lisiçansk bölgəsində Rusiyanın mövqelərini təhdid etməyə imkan verəcək.

Rusiyalıların Xarkov vilayətində olduğu kimi, öz mövqelərindən kütləvi şəkildə çəkilməsi üçün şansı azdır.

Rusiya mənbələri etiraf ediblər ki, onların qruplaşması “əməliyyat mühasirəsindədir” və onlar “dairəvi müdafiə” yürüdürlər. 0