Sofiyada IGB interkonnektorunun istismara verilməsi mərasimi keçirilib

Bakı/01.10.22/Turan: Bu gün Azərbaycan prezidenti İlham Əliyev Sofiyada Yunanıstan-Bolqarıstan interkonnektorunun (IGB) istismara verilməsi mərasimində iştirak edib. Bu konnektor Azərbaycan qazının Bolqarıstan bazarına nəqlini təmin edəcək.

Əsasən İGB Xəzər dənizinin Azərbaycan sektorunda “Şahdəniz-2” qaz-kondensat yatağının istismarı çərçivəsində hasil edilən “mavi yanacağın” Bolqarıstana nəqlini nəzərdə tutur. Bulgargaz EAD dövlət şirkəti “Şahdəniz-2” yatağından 1 milyard kubmetr qazın tədarükü üçün “Şahdəniz” konsorsiumu ilə müqavilə imzalayıb. Azərbaycan təbii qazı Bolqarıstanın tələbatının 25-30 faizini ödəyə biləcək.

Ümumi uzunluğu 182 kilometr olan İGB boru kəmərinin 150 kilometri Bolqarıstan ərazisindən keçir. Boru kəmərinin illik buraxılış qabiliyyətinin 5 milyard kubmetr olması nəzərdə tutulur.

Perspektivdə interkonnektorlar şəbəkəsi vasitəsilə Azərbaycan qazının digər Cənub-Şərqi Avropa ölkələrinə nəqli mümkün olacaq.

Mərasim zamanı Əliyev bildirib ki, 2027-ci ilə qədər Azərbaycan Avropaya təbii qaz tədarükünü iki dəfə artırmağı planlaşdırır.

Prezidentin sözlərinə görə, ötən il Azərbaycan qazının ixracı 19 milyard kubmetrə yaxın olub, o cümlədən 8,2 milyard kubmetr Avropaya nəql edilib ki, bu da əvvəlki illə müqayisədə 40 faiz çoxdur.

Mərasimdə Bolqarıstan prezidenti Rumen Radev, Avropa Komissiyasının sədri Ursula fon der Leyen, Avropa İttifaqının enerji məsələləri üzrə komissarı Kadri Simson, Şimali Makedoniya Respublikasının və Serbiyanın prezidentləri Stevo Pendarovski və Aleksandr Vuçiç, Yunanıstan və Rumıniyanın baş nazirləri Kiriakos Mitsotakis və Nikolae-İonel Çuke iştirak ediblər.

Tədbir çərçivəsində İlham Əliyev mərasimdə iştirak edən dövlət və hökumət başçıları ilə bir sıra ikitərəfli görüşlər keçirib. 06B