Sədrlər Şurası etiraz aksiyalarını doğru sayır

Çərşənbə günü Klassik Xalq Cəbhəsi Partiyasının qərargahında "AZADLIQ" Siyasi Partiyaların Əməkdaşlıq Mərkəzi Sədrlər Şurasının (SPƏMSŞ) növbəti iclası keçirilib. İclasda, ölkədəki siyasi vəziyyət, sosial-iqtisadi böhran müzakirə olunub və müvafiq qərarlar qəbul edilib.

Qərarda hakimiyyətin yarıtmaz iqtisadi siyasətinə etiraz aksiyalarının keçirilməsi doğru hesab edilir. Sosial-iqtisadi böhranın nilli maraqlara zidd nəticələrə səbəb olmaması üçün müxalif qüvvələrin fəaliyyətinin koordinasiyasına ehtiyac yarandığı vurğulanır.

İqtidardan aztəminatlı təbəqənin maraqlarını müdafiə edən, korrupsiya və rüşvəti aradan qaldıran təcili antiböhran paketinin reallaşdırılması tələb olunur.

Ölkədəki ictimai-siyasi və sosial-iqtisadi durumla bağlı dialoqun baş tutması və konkret nəticələr əldə edilməsi üçün dialoqda hakimiyyəti prezidentin təmsil etməsi doğru sayılıb.

15 yanvar 2016-ci il saat 12:00-da KXCP qərargahında “Ölkədəki iqtisadi böhran və çıxış yolları” mövzusunda keçiriləcək tədbirə bütün partiyalar və KİV-lərin dəvət edildiyi bəyan olunur.

20 yanvar şəhidlərinin anma mərasimində saat 12:00-da “AZADLIQ” Siyasi Partiyaların Əməkdaşlıq Mərkəzinin  birgə iştirakı qərara alınıb. -05D-